ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មានបានគូសបញ្ជាក់ថា មូលធនមនុស្សគឺនៅលើមួយកម្រិតទៀតដែលអ្វីគេហៅថាធនធានមនុស្ស, មូលធនមនុស្ស គឺជាអ្នកដែលមានទេពកោសល្យ មានជំនាញ មានបទពិសោធន៍ក្នុងការងារ ហើយមូលធនមនុស្សផ្តល់លទ្ធផល និងផលិតភាពខ្ពស់ជាងធនធានមនុស្សធម្មតា។

ឯកឧត្ដមបានលើកឡើងថា តាមរយៈការបណ្តុះបណ្តាលធនធានមនុស្សពាក់ព័ន្ធនឹងកិច្ចការងាររដ្ឋបាល គឺមានសារៈសំខាន់សម្រាប់ប្រទេសជាតិ និយាយដោយឡែកសម្រាប់ក្រសួងព័ត៌មាន គឺឱ្យស្របទៅនឹងការវិវឌ្ឍនៃ ប្រព័ន្ធរដ្ឋបាលរបស់កម្ពុជា ក៏ដូចជាក្របខ័ណ្ឌច្បាប់ លិខិតបទដ្ឋានគតិយុត្ដផ្សេងៗទៀត។ ការលើកឡើងរបស់ឯកឧត្ដមរដ្ឋមន្រ្ដីបែបនេះ ក្នុងឱកាសអញ្ជើញបើកវគ្គបណ្តុះបណ្តាលស្តីពី “ការលើកកម្ពស់ការអនុវត្តច្បាប់ និងការគ្រប់គ្រងរដ្ឋបាលផ្ទៃក្នុង” នាព្រឹកថ្ងៃទី១១ ខែសីហា ឆ្នាំ២០២៥ សាលមណ្ឌលបណ្តុះបណ្តាល និងវិក្រឹតការវិជ្ជាជីវៈសារព័ត៌មានទីស្តីការក្រសួងព័ត៌មាន ដើម្បីបញ្ជ្រាបការយល់ដឹងពាក់ព័ន្ធនឹងកិច្ចការងាររដ្ឋបាល ជាពិសេសតម្រង់ទិសជូនដល់មន្ត្រីរាជការឱ្យអនុវត្តន៍ការងារស្របតាមនីតិវិធីរដ្ឋបាល និងមានស្តង់ដាររួមតែមួយ។

ឯកឧត្តម នេត្រ ភក្ត្រា បានថ្លែងថា កាលពីមុនយើងនិយាយពីធនធានមនុស្ស ដែលសំដៅតែទៅលើអ្នកបានបណ្តុះបណ្តាល មានសមត្ថភាព មានទេពកោសល្យ ប៉ុន្តែយើងនៅមិនទាន់ពង្រឹងឱ្យបានខ្លាំងនៅឡើយនោះទេ ព្រោះស្របតាមបរិបទនៃប្រទេស ដែលទើបចេញពីរបបខ្មែរក្រហម ហើយបាត់បង់អ្នកចេះដឹងយ៉ាងច្រើន ។ ឯកឧត្ដមរដ្ឋមន្រ្ដីបានបន្ដថា បន្ទាប់ពីឆ្លងកាត់របបខ្មែរក្រហម រួចមក អ្នកចេះដឹងដែលនៅសល់ពីការកាប់សម្លាប់ គឺនៅសល់អ្នកចេះច្រើនខ្លះ បានជួយបង្រៀនអ្នកចេះតិច, អ្នកចេះតិចបង្រៀនអ្នកអត់ចេះ, ដែលនេះជាចំណុចផ្តើមនៃដំណើរអភិវឌ្ឍន៍ធនធានមនុស្សនៅក្នុងប្រទេសកម្ពុជា កាលពីពេលមុន ។ ប៉ុន្តែ នាពេលបច្ចុប្បន្ននេះ ធនធានមនុស្សយើងមានច្រើន ហើយរាជរដ្ឋាភិបាលបានខិតខំពង្រឹងឱ្យកាន់តែខ្លាំងបន្ថែមទៀតដើម្បីក្លាយជាមូលធនមនុស្ស បានកាន់តែច្រើន ប្រកបដោយសមត្ថភាពខ្ពស់ ហើយមិនត្រឹមតែមានចំណេះដឹងតែមួយប៉ុណ្ណោះនោះទេ ប៉ុន្តែត្រូវមានសមត្ថភាពគ្រប់គ្រាន់ ច្បាស់លាស់ មានស្នាដៃ មានសីលធម៌ មានគុណធម៌ មានសុជីវធម៌ និងមានសុខភាពល្អ។

ឯកឧត្ដមរដ្ឋមន្រ្ដីឱ្យដឹងទៀតថា គ្រប់ក្រសួង ស្ថាប័នដែលចំណុះឱ្យរាជរដ្ឋាភិបាល គឺត្រូវរៀបចំផែនការអភិវឌ្ឍន៍ធនធានមនុស្សរបស់ខ្លួន ដើរស្របយុទ្ធសាស្រ្តបញ្ចកោណ និងចក្ខុវិស័យរបស់រាជរដ្ឋាភិបាល ដើម្បីឈានទៅសម្រេចឱ្យបាននូវផែនការរបស់រាជរដ្ឋាភិបាល ដែលបានដាក់បង្គោលគោលចររួចហើយក្នុងការសម្រេចនូវបង្គោលចរពីរ ក្នុងរយៈពេល ២៥ឆ្នាំទៅមុខ ដោយប្រែក្លាយកម្ពុជាឱ្យទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់ ជាប្រទេសអភិវឌ្ឍន៍នៅឆ្នាំ២០៥០។

ឯកឧត្តម បានបញ្ជាក់បន្ថែមថា ធនធានមនុស្ស, មូលធនមនុស្ស, រដ្ឋបាលទំនើប, ការធ្វើទំនើបកម្មស្ថាប័ន គឺជាពាក្យគន្លឹះ ក្នុងការធ្វើកំណែទម្រង់ផ្នែករដ្ឋបាលរបស់ក្រសួង ស្ថាប័ន នៅក្នុងក្របខ័ណ្ឌការងាររបស់មន្ត្រីរាជការឱ្យបានល្អប្រសើរបន្ថែមទៀត៕ ប្រភព.ទ.ទ.ក