កំពង់ស្ពឺ៖ ព្រឹកថ្ងៃទី១២ ខែសីហា ឆ្នាំ២០២៥–លោកជំទាវ ឡុង បូណារេត អភិបាលរងខេត្តកំពង់ស្ពឺ អញ្ជើញជាអធិបតីភាពក្នុងពិធី អបអរសាទរ ការប្រារព្ធខួបលើកទី២៦ នៃទិវាអន្តរជាតិសម្រាប់យុវជន ១២ សីហា ឆ្នាំ២០២៥ ព្រមទាំងមានការអញ្ជើញចូលរួមពី លោក លោកស្រី ប្រធានមន្ទីរអង្គភាពនានាជុំវិញខេត្ត កងកម្លាំងទាំង៣ លោកគ្រូ អ្នកគ្រូ និងសិស្សានុសិស្សសរុបប្រមាណជា ២០០នាក់ ពិធីនេះដែរប្រារព្ធធ្វើនៅសាលប្រជុំបណ្ណាល័យកំពង់ស្ពឺ។
លោកជំទាវ ឡុង បូណារេត អភិបាលរងខេត្ត បានកោតសរសើរដ៏ស្មោះចំពោះការខិតខំប្រឹងប្រែងរបស់មន្ទីរអប់រំ យុវជន និងកីឡាខេត្ត ព្រមទាំង មន្រ្តីអប់រំ គ្រប់លំដាប់ថ្នាក់ ដែលបានរួមសហការគ្នាយ៉ាងល្អ ក្នុងការរៀបចំប្រារព្ធពិធី អបអរសាទរ ការប្រារព្ធខួបលើកទី២៦ នៃទិវាអន្តរជាតិសម្រាប់យុវជន ១២ សីហា ឆ្នាំ២០២៥ នេះឡើងដើម្បី ក្នុងគោលបំណងឱ្យយុវជនយល់ដឹងពីការអភិវឌ្ឍសង្គម និងយល់ដឹងកាន់តែច្បាស់នូវតម្រូវការរបស់ខ្លួន ក្នុងការចូលរួមអភិវឌ្ឍប្រទេសជាតិ និងការធ្វើសេចក្តីសម្រេចចិត្តនានារបស់យុវជនគ្រប់កម្មវិធី គ្រប់សកម្មភាព នៅក្នុង សហគមន៍។
ដោយឡែកនៅកម្ពុជា ទិវានេះត្រូវបានប្រារព្ធធ្វើឡើងជារៀងរាល់ឆ្នាំ ដើម្បីបញ្ជាក់ឱ្យឃើញពី ការយកចិត្តទុកដាក់របស់រាជរដ្ឋាភិបាលកម្ពុជាចំពោះយុវជន ពិសេសរាជរដ្ឋាភិបាលកម្ពុជា ដែលមាន សម្តេចមហាបវរ ធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងជាអគ្គមគ្គុទេស ប្រកបដោយគតិបណ្ឌិត ដែលសម្តេច បានចាត់ទុក “យុវជនជាកម្លាំងស្នូល ជាកោសិកាដ៏រឹងមាំ និងជាសសរទ្រូង របស់ប្រទេសជាតិ”។ ក្មួយៗគឺជាទំពាំងដ៏ល្អ ជាសសរដ៏ខ្លឹម និងរឹងមាំទៅថ្ងៃអនាគត ដូចនេះក្មួយៗ គ្មានអ្វីក្រៅពីការខិតខំសិក្សារៀនសូត្រ រៀនដើម្បីជួយខ្លួនឯង ជួយគ្រួសារ និងជួយសង្គមជាតិ ខិតខំប្រែក្លាយខ្លួនជា “កូនល្អ សិស្សល្អ មិត្តល្អ” និងជាពលរដ្ឋល្អទៅថ្ងៃអនាគត ក្តីសង្ឃឹម និងអនាគតដ៏ល្អរង់ចាំទទួលក្មួយៗគ្រប់ពេលវេលា៕ ប្រភពមន្ទីរព័ត៌មានខេត្តកំពង់ស្ពឺ..
