ខេត្តកំពង់ស្ពឺនៅព្រឹកថ្ងៃទី១៤ខែសីហា ឆ្នាំ ២០២៥ នេះឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ អញ្ជើញចូលរួមជាអធិបតីភាពក្នុងវេទិកាពីព្រោះយោបល់ជាមួយសហគមអង្គការមិនមែនរដ្ឋាភិបាល និង សហគមន៍នានាដែលធ្វើសកម្មភាពក្នុងមូលដ្ឋានខេត្តកំពង់ស្ពឺ និងអ្នកចូលរួមសរុបប្រមាណ២៦០នាក់ នៅបុរីរដ្ឋបាលខេត្តសាលប្រជុំ វ៉ី សំណាង ។
នាឱកាសនោះឯកឧត្តមបណ្ឌិត ជាម ច័ន្ទសោភ័ណ បានលើកឡើងថា វេទិកាពិគ្រោះយោបល់ស្ដីពីភាពជាដៃគូរវាងរដ្ឋបាលខេត្តកំពង់ស្ពឺ និងអង្គការសង្គមស៊ីវិលនាពេលនេះ គឺស្របទៅតាមគោលការណ៍របស់ក្រសួងមហាផ្ទៃ ដែលបានណែនាំឱ្យរដ្ឋបាលថ្នាក់ក្រោមជាតិ ធ្វើការរៀបចំវេទិកានេះឡើងដើម្បីស្ដាប់ពីបញ្ហាប្រឈមនានា សំណូមពរផ្សេង ក្នុងន័យដើម្បីជួយពង្រឹង ពង្រីក និងលើកកម្ពស់កិច្ចសហប្រតិបត្តិការរវាងរាជរដ្ឋាភិបាលកម្ពុជា រដ្ឋបាលថ្នាក់ក្រោមជាតិ ពិសេសរដ្ឋបាលខេត្តកំពង់ស្ពឺ ជាមួយនឹងបណ្ដាអង្គការ សមាគម សហគម ឱ្យកាន់តែប្រសើរឡើង។
ក្នុងន័យនេះដែរ ឯកឧត្តមបណ្ឌិត បានអនុញ្ញាតឱ្យសហគម អង្គការមិនមែនរដ្ឋាភិបាល និង សហគមន៍នានា ឡើងមានចំណាប់អារម្មណ៍ សំណើរ សំណូមពរ ក្តីកង្វិល ផ្សេងៗយ៉ាងផុសផុល និងឆ្លើយតប ទៅនឹងតម្រូវការនានារបស់ប្រជាពលរដ្ឋក្នុងដែនសមត្ថកិច្ចរបស់រដ្ឋបាលក្រុង ស្រុក ឃុំ សង្កាត់ មួយៗប្រកបដោយ ប្រសិទ្ធភាព តម្លាភាព គណនេយ្យភាព បរិយាបន្ន និងសមធម៌សង្គម រដ្ឋបាលខេត្តស្នើឱ្យ អភិបាលក្រុង ស្រុក ឃុំ សង្កាត់ ត្រូវយកចិត្តទុកដាក់អនុវត្តនូវកិច្ចការនេះឱ្យមានប្រសិទ្ធភាព។
ឯកឧត្តមបណ្ឌិតបានបន្តថា រដ្ឋាភិបាលកម្ពុជា ដឹកនាំដោយសម្ដេចមហាបវរអធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានចាត់ទុកអង្គការសង្គមស៊ីវិល ជាតួអង្គមួយដ៏សំខាន់ក្នុងការចូលរួមអភិវឌ្ឍប្រទេស ក្នុងនោះអង្គការសង្គមស៊ីវិលបានខិតខំជួយជ្រោមជ្រែងក្នុងការរស់នៅរបស់ប្រជាពលរដ្ឋ ទាំងជីវភាពរស់នៅ ការប្រកបរបរជាដើម។
ក្នុងឱកាសនោះ ឯកឧត្តមបណ្ឌិតក៏បានស្នើដល់អង្គការសង្គមស៊ីវិលទាំងអស់ក្នុងខេត្ត សូមឱ្យមានរបាយការណ៍អំពីសកម្មភាពរបស់អង្គភាពរបស់ខ្លួនដល់រដ្ឋបាលខេត្តបាត់ដំបង ដើម្បីឱ្យរដ្ឋបាលខេត្តកំពង់ស្ពឺ បានទទួលព័ត៌មានបន្ថែមអំពីសកម្មភាពដែលអង្គការបាននឹងកំពុងតែប្រតិបត្តិការ ត្រូវកំណត់ខ្លឹមសារនៃប្រធានបទសម្រាប់វេទិកាពិគ្រោះយោបល់ ដោយផ្តោតសំខាន់លើស្ថានភាព និង បញ្ហាប្រឈមជាក់ស្តែងនៅមូលដ្ឋានពាក់ព័ន្ធ នឹង ការផ្សព្វផ្សាយ និង លើកកម្ពស់ការយល់ដឹងអំពីច្បាប់ និង លិខិតបទដ្ឋានគតិយុត្ត ការយល់ដឹងអំពីសិទ្ធិនិងកាតព្វកិច្ចរបស់អង្គការសង្គមស៊ីវិលក្នុងក្របខ័ណ្ឌច្បាប់ ព្រមទាំងការលើកកម្ពស់ភាពជាដៃគូរវាងរដ្ឋបាលថ្នាក់ក្រោមជាតិជាមួយអង្គការសង្គមស៊ីវិលដែលធ្វើសកម្មភាព ក្នុងដែនសមត្ថកិច្ចរបស់ខ្លួន។
ឯកឧត្តមបណ្ឌិត បានបញ្ជាក់ថា រដ្ឋបាលខេត្តសង្ឃឹមថា កិច្ចសហប្រតិបត្តិការភាពជាដៃគូ រវាងរដ្ឋបាលខេត្ត និងអង្គការសង្គមស៊ីវិលដែលបាននឹងកំពុងប្រតិបត្តិការនៅក្នុងខេត្តកំពង់ស្ពឺ ត្រូវបានពង្រឹងលើកកម្ពស់បន្ថែម តាមរយៈការសិក្សាស្វែងយល់ពីគ្នាទៅវិញទៅមក ការឆ្លើយតបអំពីបញ្ហាប្រឈម ក្តីកង្វល់ និងតម្រូវការនានាផងដែរ៕ ប្រភព÷រដ្ឋបាលខេត្តកំពង់ស្ពឺ.
