កិច្ចប្រជុំបូកសរុបលទ្ធផលការងារកសិកម្ម រុក្ខាប្រមាញ់ និងនេសាទខេត្តកំពង់ស្ពឺ

ខេត្តកំពង់ស្ពឺ÷ នៅថ្ងៃទី១៧ ខែតុលា ឆ្នាំ២០២៥-លោក យឹម ណន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ស្ពឺ នាថ្ងៃសុក្រ ទី១៧ ខែតុលា ឆ្នាំ២០២៥ បានដឹកនាំកិច្ចប្រជុំស្តីពី “ការបូកសរុបលទ្ធផលការងារកសិកម្ម រុក្ខាប្រមាញ់ និងនេសាទប្រចាំខែតុលា និងលើកទិសដៅការងារសម្រាប់ខែវិច្ឆិកា ឆ្នាំ២០២៥ ដោយមានការចូលរួមពីថ្នាក់ដឹកនាំខណ្ឌរដ្ឋបាល និងគ្រប់ការិយាល័យជំនាញ ថ្នាក់ឃុំ សង្កាត់ ស្រុក ក្រុងទូទាំងខេត្តកំពង់ស្ពឺ។

លោក យឹម ណន បានមានប្រសាសន៍ថាកិច្ចប្រជុំនេះ មានគោលបំណងពិភាក្សាពីការជ្រើសរើសកសិករចូលរួមកម្មវិធីវេទិកា និងពិព័រណ៍កសិកម្មកម្ពុជាឆ្នាំ២០២៥ ( CAFE25 ) នៅមជ្ឍមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញ បូកសរុបលទ្ធផលការងារកសិកម្ម រុក្ខាប្រមាញ់ និងនេសាទនាពេលកន្លងមក ដើម្បីពិនិត្យលើសកម្មភាពដែលបានអនុវត្ត និងសកម្មភាពដែលមិនទាន់បានអនុវត្ត និងលើកទិសដៅសកម្មភាពអនុវត្តបន្ត។

នាឱកាសនោះ លោក យឹម ណន បានពន្យល់បន្ថែមពីគោលនយោបាយអាទិភាពទី៥និងទី៦ របស់រាជរដ្ឋាភិបាលកម្ពុជា នីតិកាលទី៧នៃរដ្ឋសភា ដែលបានដាក់ចេញលើវិស័យកសិកម្មគឺ ការរក្សាលំនឹងថ្លៃកសិផល ការពង្រាយមន្ត្រីកសិកម្មឃុំ និងការអភិវឌ្ឍន៍សហគមន៍កសិកម្មទំនើប។ តាងនាមមន្ទីរកសិកម្មកសិកម្ម រុក្ខាប្រមាញ់ និងនេសាទ ខេត្តកំពង់ស្ពឺលោក មានបំណងចង់ឱ្យដីទាំងអស់ក្លាយជានិមិត្តសញ្ញានៃក្តីសង្ឃឹម វាលបៃតងស្រស់ ដែលកើតចេញពីការខិតខំប្រឹងប្រែងគ្រប់តួអង្គពាក់ព័ន្ធជាមួយនឹងការប្តេជ្ញាចិត្ត និងការចូលរួមសហការរួមគ្នាដើម្បីបេសកកម្មកាត់បន្ថយភាពក្រីក្រ ធានាបាននូវសន្តិសុខស្បៀង និងការកសាងនូវសហគមន៍ជនបទរួមគ្នាក្រោមម្លប់សុខសន្តិភាព៕

ប្រភពមន្ទីរព័ត៌មាន.