ខេត្តកំពង់ស្ពឺ៖ ថ្ថ្ងៃទី១១ ខែវិច្ឆិកា ឆ្នាំ២០២៥-ឯកឧត្តមយឹម សុខុម ប្រធានក្រុមប្រឹក្សាខេត្ត និងឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺនាព្រឹកថ្ងៃទី១១ខែវិច្ឆិកាឆ្នាំ២០២៥បានដឹកនាំបើកកិច្ចប្រជុំសាមញ្ញលើកទី១៨របស់ក្រុមប្រឹក្សាខេត្តនិងលើកទិសដៅការងារនៅខែ បន្ទាប់ ដោយផ្តោតសំខាន់ ពិនិត្យនិងអនុម័តសេចក្តីព្រាងកំណត់ហេតុនៃកិច្ចប្រជុំសាមញ្ញលើកទី១៧របស់ក្រុមប្រឹក្សាខេត្ត -ពិនិត្យនិងអនុម័តរបាយការណ៍ស្តីពីលទ្ធផលនៃការអនុវត្តការងារប្រចាំខែតុលាឆ្នាំ២០២៥របស់រដ្ឋបាលខេត្តនិងពិនិត្យ អនុម័ត តារាងបែងចែកប្រាក់រង្វាន់ លើកទឹកចិត្តសម្រាប់ឧបត្ថម្ភជូនមន្ត្រីរាជការ បុគ្គលិក នៃរដ្ឋបាលខេត្តសម្រាប់ខែតុលាឆ្នាំ២០២៥។ពិធីនេះប្រារព្ធធ្វើនៅសាលប្រជុំសាលាខេត្ត ។
ឯកឧត្តម យឹម សុខុម បានសម្តែងនូវការកោតសរសើរដល់ ឯកឧត្តមបណ្ឌិត អភិបាលខេត្ត និងជាប្រធានគណៈបញ្ជាការឯកភាពខេត្តដែលបានយកចិត្តទុកដាក់ខ្ពស់ក្នុងការរក្សាសន្តិសុខ និងសណ្តាប់ធ្នាប់ជូនប្រជាពលរដ្ឋនិងបានថ្លែងជំរុញឲ្យ គណៈបញ្ជាការឯកភាពគ្រប់លំដាប់ថ្នាក់បន្តអនុវត្តគោលនយោបាយភូមិឃុំ សង្កាត់ មានសុវត្ថិភាព ជាប់ជាប្រចាំ ព្រមទាំងបន្តខិតខំប្រឹង ប្រែង ក្នុងការបំពេញតួនាទីភារកិច្ចយ៉ាងសកម្មប្រកបដោយស្មារតីទទួលខុសត្រូវខ្ពស់ ឆ្ពោះទៅសម្រេចបាននូវសមិទ្ធផលនានា ចូលរួមថែរក្សាការពារសន្តិសុខ សណ្តាប់ធ្នាប់ សាធារណៈ និងសុវត្ថិភាពសង្គមបានយ៉ាងល្អប្រសើរ។
ក្នុងឱកាសនោះដែរ ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តបានណែនាំដល់ រដ្ឋបាលឯកភាពខេត្ត ឲ្យបន្តប្រើប្រាស់វិធានការសរុប កម្លាំងសរុប និងមធ្យោបាយសរុប ក្នុងការបង្កើនយុទ្ធនាការអនុវត្តគោលនយោបាយភូមិឃុំ-សង្កាត់ មានសុវត្ថិភាព សំដៅប្រតិបត្តិការបង្ក្រាបល្បែងស៊ីសង ខុសច្បាប់មួយចំនួនរួមមាន ក្មេងទំនើង គ្រឿងញៀន អំពើជួញដូរមនុស្ស អំពើចោរកម្មនានា ទទួលបានលទ្ធផល ល្អដើម្បី បង្កលក្ខណៈអំណោយផល នៃសន្តិសុខ និងសុវត្ថិភាពជូនប្រជាពលរដ្ឋរស់នៅប្រកបដោយ ភាពសុខដុម ជាមួយនឹងជីវភាពសមរម្យ ក្នុងដែនសមត្ថកិច្ចខេត្ត។ ជាមួយគ្នានេះ សូមគណៈបញ្ជាការឯកភាពគ្រប់លំដាប់ថ្នាក់យកចិត្តទុកដាក់អនុវត្តវិធានការ ទប់ស្កាត់ បង្ការ និងបង្ក្រាបករណីលួច ឆក់ ប្លន់ និងករណីក្មេងទំនើងឱ្យជាប់ជាប្រចាំ។
ដោយឯកឧត្តមបណ្ឌិតអភិបាលខេត្តបានបញ្ញាក់ថា «ការអនុវត្តគោលនយោបាយ “ភូមិ ឃុំ-សង្កាត់ មានសុវត្ថិភាព” គឺជាការងាររួម ដែលទាមទារនូវកម្លាំងសរុប វិធានការសរុប និងការចូលរួមយ៉ាងសកម្មពីសំណាក់ប្រជាពលរដ្ឋគ្រប់រូប»។ នេះបង្ហាញពីសារៈសំខាន់នៃការកសាងភាពជាដៃគូដ៏រឹងមាំរវាងកងកម្លាំងសមត្ថកិច្ច និងប្រជាពលរដ្ឋដើម្បីសុវត្ថិភាពរួម៕
ប្រភពរដ្ឋបាលខេត្តកំពង់ស្ពឺ.
