ខេត្តកំពង់ស្ពឺ៖ ថ្ងៃទី២១ ខែវិច្ឆិកា ឆ្នាំ២០២៥–កិច្ចប្រជុំបូកសរុប របាយការណ៍ សកម្មភាពការងារ របស់និស្សិតស្ម័គ្រចិត្តអប់រំបរិស្ថានកូរ៉េ ឆ្នាំ២០២៥ ក្រោមអធិបតីភាពលោក គុជ សាភីន អភិបាលរងស្រុកសំរោងទង លោក យី ថេន អនុប្រធានមន្ទីរអប់រំ យុវជននិងកីឡាខេត្តកំពង់ស្ពឺ លោក Kim Hyeonchan ប្រធានក្រុមនិស្សិតស្ម័គ្រចិត្ត ព្រមទាំងការអញ្ជើញចូលរួមពី លោកគ្រូ អ្នកគ្រូ ក្រុមនិស្សិតស្ម័គ្រចិត្ត និងសិស្សានុសិស្សជាច្រើនទៀត ពិធីនេះដែរប្រារព្ធធ្វើនៅអនុវិទ្យាល័យទន្លេកន្ទឹល។
លោក Kim Hyeonchan ប្រធានក្រុមនិស្សិតស្ម័គ្រចិត្ត បានមតិស្វាគមន៍ និងអានរបាយការណ៍ស្តីពីទិសដៅ និងចក្ខុវិស័យរបស់អង្គការសមាគមន៍និស្សិតស្ម័គ្រចិត្តកូរ៉េ នៅកម្ពុជា កម្មវិធីស្ម័គ្រចិត្តរយៈពេលមធ្យមរបស់ KOICA (វិស័យបរិស្ថាន) ឆ្នាំ2024–2026 បានបញ្ជូនយុវជនកូរ៉េទៅកាន់ប្រទេសកម្ពុជា ក្នុងនាមជាផ្នែកមួយនៃគម្រោងរយៈពេល ៣ ឆ្នាំ ក្រុមនិស្សិតត្រូវបានបញ្ចប់ភារកិច្ចរបស់ខ្លួន និងបានរៀបចំព្រឹត្តិការណ៍ចែករំលែកលទ្ធផលនៅចុងបញ្ចប់ គម្រោងនេះមានគោលបំណងបង្កើនសមត្ថភាពការអប់រំបរិស្ថានរបស់កម្ពុជា ហើយបានអនុវត្តរយៈពេល៣ ឆ្នាំ ចាប់ផ្តើមពីការបញ្ជូនដំបូងក្នុងខែសីហា ឆ្នាំ ២០២៤ សរុបមានយុវជនស្ម័គ្រចិត្តចំនួន ៤២ នាក់ ត្រូវបានបញ្ជូនទៅតំបន់ភ្នំពេញ កំពង់ស្ពឺ និងតាកែវ អស់រយៈពេលប្រហែល ១៦ ខែ ដើម្បីអនុវត្តសកម្មភាពផ្សេងៗក្នុងការកែលម្អបរិយាកាសសិក្សា និងលើកកម្ពស់ការយល់ដឹងអំពីបរិស្ថាន។
ឆ្លៀតក្នុងឱកាសនោះដែរលោក យី ថេង អនុប្រធានមន្ទីរអប់រំ យុវជន និងកីឡាខេត្ត បានថ្លែងនូវការកោតសរសើរនិងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមនិស្សិតស្ម័គ្រចិត្តកូរ៉េចំនួន ៤២ នាក់ ដែលបានចំណាយពេលប្រហែល ១៦ ខែ អនុវត្តសកម្មភាពអប់រំបរិស្ថាននៅតាមសាលារៀននានាក្នុងខេត្តកំពង់ស្ពឺ ក៏ដូចជាភ្នំពេញ និងតាកែវ។ លោកបានគូសបញ្ជាក់ថា៖ តាមរយៈសកម្មភាពទាំងនេះ សាលារៀនជាច្រើនបានផ្លាស់ប្តូរបរិយាកាសសិក្សាឱ្យកាន់តែមានអនាម័យ បរិស្ថានល្អប្រសើរ និងបានលើកកម្ពស់ការយល់ដឹងរបស់សិស្សានុសិស្សអំពីសារៈសំខាន់នៃការថែរក្សាបរិស្ថាន ភាពស្អាតស្អំ និងការគ្រប់គ្រងសំរាមប្រកបដោយនិរន្តរភាព។
លោកបានសង្កត់ធ្ងន់លើតួនាទីសំខាន់នៃការអប់រំបរិស្ថានក្នុងការកសាងធនធានមនុស្សដែលមានការទទួលខុសត្រូវ និងបានលើកទឹកចិត្តដល់លោកគ្រូ អ្នកគ្រូទាំងអស់ឱ្យបន្តយកចិត្តទុកដាក់ និងដាក់បញ្ចូលការអប់រំបរិស្ថាននេះទៅក្នុងកម្មវិធីសិក្សា និងសកម្មភាពក្រៅម៉ោងសិក្សាជាប្រចាំ។ លោកបានថ្លែងអំណរគុណយ៉ាងជ្រាលជ្រៅដល់អង្គការ KOICA និងសមាគមន៍និស្សិតស្ម័គ្រចិត្តកូរ៉េ ដែលបានផ្តល់ជំនួយបច្ចេកទេស និងធនធានមនុស្សដ៏មានតម្លៃនេះ ដល់វិស័យអប់រំក្នុងខេត្តកំពង់ស្ពឺ ហើយសង្ឃឹមថាគម្រោងរយៈពេល ៣ ឆ្នាំនេះនឹងបន្តទទួលបានជោគជ័យ និងមានការបន្តកិច្ចសហប្រតិបត្តិការនាពេលអនាគត។
ថ្លែងក្នុងឱកាសនោះដែរ លោក គុជ សាភីន អភិបាលរងស្រុក បានសម្តែងការពេញចិត្ត និងស្វាគមន៍ចំពោះរាល់សកម្មភាពដែលនិស្សិតស្ម័គ្រចិត្តកូរ៉េបានអនុវត្តនៅក្នុងមូលដ្ឋានស្រុកសំរោងទង។ សកម្មភាពអប់រំបរិស្ថានទាំងនោះ ពិតជាបានរួមចំណែកយ៉ាងសំខាន់ក្នុងការកែលម្អសោភ័ណភាព និងគុណភាពបរិស្ថាននៅក្នុងសាលារៀន ដែលជាមូលដ្ឋានគ្រឹះសម្រាប់ការអភិវឌ្ឍន៍សហគមន៍ឱ្យកាន់តែប្រសើរឡើង។ លោកបានស្នើសុំដល់អាជ្ញាធរភូមិ ឃុំ លោកគ្រូ អ្នកគ្រូ និងសិស្សានុសិស្សទាំងអស់ក្នុងស្រុកសំរោងទង ត្រូវបន្តថែរក្សា និងពង្រីកនូវសមិទ្ធផលដែលនិស្សិតស្ម័គ្រចិត្តបានបន្សល់ទុក ដោយធានាថាការយល់ដឹង និងការអនុវត្តល្អៗទាក់ទងនឹងបរិស្ថាន ត្រូវតែបន្តក្លាយជាទម្លាប់ប្រចាំថ្ងៃផងដែរ។
កិច្ចប្រជុំបូកសរុប របាយការណ៍ សកម្មភាពការងារ របស់និស្សិតស្ម័គ្រចិត្តអប់រំបរិស្ថានកូរ៉េ ឆ្នាំ២០២៥.
