កំពង់ស្ពឺ៖ រសៀលថ្ងៃសៅរ៍ ទី១៣ ខែធ្នូ ឆ្នាំ២០២៥នេះ-ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ និងលោកជំទាវ ម៉េង វ៉ាន់ដានីន និងមន្ត្រីររាជការ បន្តទទួលសម្ភារៈ ថវិកា របស់បងប្អូននាក់កំពង់ស្ពឺ និងចុះពិនិត្យដោយផ្ទាល់នូវកន្លែងដាក់សម្ភារៈ កន្លែងវិចខ្ចប់ គឺដើម្បីធានាថាការត្រៀមរៀបចំទាំងអស់ប្រព្រឹត្តទៅបានយ៉ាងល្អិតល្អន់ សម្រាប់ត្រៀមនាំយកទៅផ្តល់ជូនដល់វីរៈកងទ័ពជួរមុខ និងបងប្អូនប្រជាពលរដ្ឋជនភៀសសឹក នៅទីទួលសុវត្ថិភាព នេះគឺពិតជាមានសារៈសំខាន់ណាស់ក្នុងការលើកទឹកចិត្ត និងជួយសម្រួលដល់ការរស់នៅរបស់ពួកគាត់។
សកម្មភាព និងការខិតខំទាំងអស់នេះសរបញ្ជាក់បង្ហាញឱ្យឃើញពីការយកចិត្តទុកដាក់ និងការចាត់ចែងប្រកបដោយការទទួលខុសត្រូវខ្ពស់ពីសំណាក់ថ្នាក់ដឹកនាំខេត្តកំពង់ស្ពឺ មុននឹងយកសម្ភារៈទាំងនោះទៅ ផ្តល់ជូនដល់វិរៈកងទ័ព និងជនភៀសសឹក។
ឯកឧត្តមបានមានប្រសាសន៍ថា៖ សកម្មភាពនេះមិនត្រឹមតែជាការបរិច្ចាគសម្ភារៈប៉ុណ្ណោះទេ តែជាការបង្ហាញយ៉ាងច្បាស់អំពីស្មារតីស្នេហាជាតិ ភាពកក់ក្តៅ និងការដឹងគុណយ៉ាងជ្រាលជ្រៅរបស់ប្រជាពលរដ្ឋខេត្តកំពង់ស្ពឺ ចំពោះកងទ័ពដែលបានលះបង់ដើម្បីបុព្វហេតុការពារបូរណភាពទឹកដី និងសន្តិសុខជាតិ។ ការចូលរួមនេះពិតជាមានតម្លៃមិនអាចកាត់ថ្លៃបាន ក្នុងការជួយសម្រាលបន្ទុក និងលើកទឹកចិត្តដល់កងទ័ពជួរមុខ ក៏ដូចជាបងប្អូនជនភៀសសឹករបស់យើង។ សរុបមក សកម្មភាពនេះជាការរួមចំណែកដ៏មានតម្លៃពីខេត្តកំពង់ស្ពឺ ក្នុងការពង្រឹងស្មារតីជាតិ និងគាំទ្រដល់អ្នកដែលកំពុងបំពេញបេសកកម្មសំខាន់ៗដើម្បីជាតិ។
ប្រភព.មន្ទីរព័ត៌មានខេត្តកំពង់ស្ពឺ.
