កំពង់ស្ពឺ៖ ថ្ងៃទី៣ ខែមករា ឆ្នាំ២០២៦-នៅសាលាខេត្តកំពង់ស្ពឺ ឯកឧត្តម យឹម សុខុម ប្រធានក្រុមប្រឹក្សាខេត្ត និង ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្ត បានអញ្ជើញជាអធិបតីក្នុងពិធីទទួលអំណោយមនុស្សធម៌ពី មូលនិធិចែករំលែកសង្គ្រោះជីវិតសកល នៃសាធារណរដ្ឋកូរ៉េ ជូនដល់រដ្ឋបាលខេត្តកំពង់ស្ពឺ តាមរយៈ ឯកឧត្តម ម៉ម ប៊ុននាង ប្រធានគណៈកម្មការទី១០ នៃព្រឹទ្ធសភា។
ក្នុងឱកាសនោះ ឯកឧត្តមបណ្ឌិត ជាម ច័ន្ទសោភ័ណ បានថ្លែងអរគុណយ៉ាងស្មោះស្ម័គ្រចំពោះមូលនិធិចែករំលែកសង្គ្រោះជីវិតសកលរបស់ឯកឧត្តម ម៉ម ប៊ុននាង ដែលបានផ្តល់ក្តីស្រឡាញ់ និងការចែករំលែកដល់ប្រជាពលរដ្ឋខេត្តកំពង់ស្ពឺ តាមរយៈគ្រឿងឧបភោគ បរិភោគ និងសម្ភារៈចាំបាច់ផ្សេងៗ។
ឯកឧត្តមអភិបាលខេត្ត បានគូសបញ្ជាក់ថា សកម្មភាពនាថ្ងៃនេះ គឺជាការបង្ហាញឱ្យឃើញនូវវប្បធម៌នៃការចែករំលែក និងទំនាក់ទំនងមិត្តភាពដ៏ល្អ រវាងប្រជាជនកម្ពុជា និងប្រជាជននៃសាធារណរដ្ឋកូរ៉េ ជាពិសេសគឺការជួយគ្នាដោយមិនប្រកាន់និន្នាការក្នុងគ្រាដែលបងប្អូនប្រជាពលរដ្ឋត្រូវការជំនួយ។ រដ្ឋបាលខេត្តនឹងចាត់ចែងចែកចាយអំណោយទាំងនេះ ឱ្យទៅដល់ដៃបងប្អូនប្រជាពលរដ្ឋជនភៀសសឹកដោយផ្ទាល់ ដើម្បីជួយសម្រាលទុក្ខលំបាក និងផ្តល់ភាពកក់ក្តៅជូនពួកគាត់ក្នុងគ្រាដ៏ចាំបាច់នេះ។
——————
ប្រភព.មន្ទីរព័ត៌មានខេត្តកំពង់ស្ពឺ
