ខេត្តកំពង់ស្ពឺ៖ ផ្ទះមួយខ្នងដែលធ្វើអំពីឈើលើថ្មក្រោម និងឃ្លាំងមួយកន្លែងដែលគេស្គាល់ថាជារបស់លោក ខូវ ឡាយតិច កំពុងតែធ្វើការសាងសង់ជារៀងរាល់ថ្ងៃនៅជាប់ជើងភ្នំ(ក្រឡាបឹង) ស្ថិតនៅក្នុងភូមិព្រៃកន្ទ្រុង ឃុំធម្មអរ ស្រុកសំរោងទង ខេត្តកំពង់ស្ពឺ បានយ៉ាងរលូន អាជ្ញាធរ និងជំនាញពាក់ព័ន្ធហាក់បីដូចមិនអើពើសោះ ។
ប្រជាពលរដ្ឋរស់នៅក្នុងភូមិព្រៃកន្ទ្រុង ឃុំធម្មតាអរ ស្រុកសំរោងទងបានបង្ហើបឱ្យដឹងថា ការសាងសង់ផ្ទះ និង សាងសង់ឃ្លាំងនេះមានសកម្មភាពជាង០២ខែកន្លងទៅហើយ ដែលម្ចាស់ទីតាំងខាងលើបានធ្វើការសាងសង់ផ្ទះមួយខ្នងធ្វើអំពីឈើលើ ថ្មខាងក្រោម និងមានការជីកកាយជើងភ្នំធ្វើជាផ្លូវចាក់ថ្មមិច និងមានដាក់កញ្ចុះនៅលើដីនោះថែមទៀតផង។ ប្រជាពលរដ្ឋបានបន្តថាផ្ទះនិងឃ្លាំងដែលធ្វើការសាងសង់នោះជិតរួចរាល់មួយរយភាគរយហើយ១០០%ហើយត្រឹមតែរយះពេលជាង០១ខែសោះ គេមិនដែលឃើញអាជ្ញាធរនិងជំនាញចុះមកពិនិត្យនិងធ្វើការហាមឃាត់ក្រុមជាងៗដែលធ្វើការសាងសង់នោះឡើយ ខណៈដែលផ្ទះនិងឃ្លាំងខាងលើនេះសង់ជិតជើងភ្នំ ដែលជាសម្បត្តិរបស់រដ្ឋនោះ។
មជ្ឈដ្ឋានមហាជនលើកឡើងថា តើអ្នកដែលហ៊ានធ្វើការសាងសង់ផ្ទះនិងសាងសង់ឃ្លាំងនៅជាប់ជើងភ្នំនេះជានរណា? ប្រហែលជាមានលុយនិងមានអំណាចហើយទើបអាចធ្វើការសាងសង់លំនៅដ្ឋាន និងសាងសង់ឃ្លាំងជាប់ជើងភ្នំដែលជាសម្បត្តិធនធានធម្មជាតិដ៏កម្របែបនេះបាននោះ!។ប្រជាពលរដ្ឋដាក់ការសង្ស័យថា សង្ស័យមានការឃុបឃិតនិងត្រូវរ៉ូវជាមួយអាជ្ញាធរ និងជំនាញពាក់ព័ន្ធហើយទើបម្ចាស់ទីតាំងហ៊ានធ្វើការសាងសង់ផ្ទះនិងឃ្លាំងជាប់ជើងភ្នំធ្វើជាសម្បត្តិផ្ទាល់ខ្លួនបានបែបនេះ។
ពាក់ព័ន្ធនិងរឿងសាងសង់ផ្ទះនិងសាងសង់ឃ្លាំងនៅក្បែរជើងភ្នំក្រឡាបឹងនេះដែរ លោក អែម ធន មេឃុំធម្មតាអរ នៃស្រុកសំរោងទងបានឱ្យដឹងតាមទូរស័ព្ទថា គេរត់ច្បាប់របស់គេហើយ មិនទាន់ឃើញច្បាប់មកដល់គេធ្វើឃ្លាំងមិនដឹងថាឃ្លាំងដាក់អីឱ្យប្រាកដនោះទេ។ ហើយដីនេះលោក ខូវ ឡាយតិច បានទិញពីប្រជាពលរដ្ឋនៅក្នុងភូមិព្រៃកន្ទ្រុង ឃុំធម្មតាអរ ទំហំជាង០១ហិកតា ការសាងសង់ប្រហែលជាមួយខែ ពីរខែមកហើយ លោក ខូវ ឡាយតិច រស់នៅម្តុំផ្សារកំពង់ស្ពឺទេប៉ុន្តែគាត់មកទិញដីនៅនឹង។
ដោយឡែកលោក សូ សុភិន ប្រធានការិយាល័យសុរិយោដីស្រុកសំរោងទង ក្រុមអ្នកសារព័ត៌មានយើងបានតេទំនាក់ទំនងតាមទូរស័ព្ទដើម្បីសុំសួរនាំពីការសាងសង់ផ្ទះ និងឃ្លាំងពីសំណាក់ លោក ខូវ ឡាយតិច តែតេចូលចំនួន០២ដង មិនមានអ្នកលើក។
ចំណែកលោក ប៊ិញ ជីវតុង ប្រធានមន្ទីររ៉ែ និងថាមពលខេត្តកំពង់ស្ពឺ អ្នកសារព័ត៌មានបានទំនាក់ទំនងតាមលេខទូរស័ព្ទដើម្បីសួរព័ត៌មានពីការជីកកាយជើងភ្នំក្រឡាបឹង ធ្វើការសាងសង់ឃ្លាំងពីសំណាក់លោក ខូវ ឡាយតិច ប៉ុន្តែតេចូលចំនួន០២ដង មិនមានអ្នកទទួល។
រីឯលោក ខូវ ឡាយតិច អ្នកយកព័ត៌មានយើងទំនាក់ទំនងតាមលេខទូរស័ព្ទ លោកឆ្លើយបដិសេធថា គាត់មិនមែនឈ្មោះ ខូវ ឡាយតិច នោះទេ។
អង្គភាពសារព័ត៌មានយយេីង គ្រាន់តែជាកញ្ចក់ឆ្លុះបញ្ចាំង ពីទិដ្ឋភាពសង្គម ផ្សាយចេញនូវព័ត៌មានពិត ពីប្រជាពលរដ្ឋ ស្របតាមក្រមសីលធម៌ វិជ្ជាជីវៈ និងធម្មនុញ្ញ វិជ្ជាជីវៈសារព័ត៌មាន ពុំបានមូលបង្កាច់បង្ខូចកេរ្ដិ៍ឈ្មោះ និងសេចក្ដីថ្លៃថ្នូរ អាជ្ញាធរ និងជំនាញពាក់ព័ន្ធណាមួយនោះឡើយ។
ជុំវិញការចុះផ្សាយខាងលើនេះប្រសិនបើមានប្រតិកម្មណាមួយពីអាជ្ញាធរ និងជំនាញពាក់ព័ន្ធណាមួយនោះ.អង្គភាពសារព័ត៌មានយើងនឹងរងចាំទទួលធ្វើការបកស្រាយ បំភ្លឺគ្រប់ពេលវេលា នៅរៀងរាល់ម៉ោងធ្វើការ ស្តីពីច្បាប់របបនៃសារព័ត៌មានកម្ពុជា.សូមអរគុណ ៕
