ខេត្តកំពង់ស្ពឺ៖ ថ្ងៃទី១៧ មេសា ឆ្នាំ២០២៦—តាមរបាយការណ៍ របស់មន្ទីរទេសចរណ៍ខេត្តកំពង់ស្ពឺបានឱ្យដឹងថា រយៈពេលបីថ្ងៃ នៅថ្ងៃទី១៤-១៥-១៦ ខែមេសា ឆ្នាំ២០២៦ ពិធីបុណ្យចូលឆ្នាំថ្មីប្រពៃណីជាតិខ្មែរយើង ព្រមទាំងមានព្រឹត្តិការណ៍កំពង់ស្ពឺសង្រ្កាន្តផងដែរ ដោយរួមជាមួយព្រឹត្តិការណ៍ផ្សេងៗ រៀបចំដោយរដ្ឋបាលខេត្ត មានភ្ញៀវទេសចរណ៍ជាតិ និងអន្តរជាតិមកលេងកម្សាន្ត ប្រមាណ ១,៧១២,០០០នាក់ ដែលបានមកទស្សនាកម្សាន្ត ក្នុងព្រឹត្តិការណ៍កំពង់ស្ពឺសង្ក្រាន្តក្រុងច្បារមននិងតាមរមណីយដ្ឋាន សហគមន៍ទេសចរណ៍ក្នុងខេត្តកំពង់ស្ពឺ។
ក្នុងនោះមានព្រឹត្តិការណ៍ កំពង់ស្ពឺសង្ក្រាន្តក្នុងក្រុងច្បារមនមានទេសចរណ៍ចូលរួមប្រមាណជាង ៧៣៥,៥៥០នាក់ ភ្ញៀវទេសចរណ៍បរទេសចំនួន ៩១០នាក់ ដែលរដ្ឋបាលខេត្តកំពង់ស្ពឺបានរៀបចំកម្មវិធីជាច្រើនមានដូចជា ការដង្ហែរក្បួនព្យុហយាត្រា ព្រ័ត្រយក្ស ប្រវែង៨០ម៉ែត្រ ទាញព្រ័ត្រឆ្នាំចាស់ផ្លាស់ឆ្នាំថ្មី ការលេងល្បែងប្រជាប្រិយខ្មែរជាច្រើនមុខ ការសម្តែងរបាំប្រពៃណីខ្មែរ និងរាំលេងកម្សាន្តចង្វាក់ប្រពៃណីខ្មែរ ដើម្បីបង្ហាញអោយយុវជនជំនាន់ក្រោយបានយល់ដឹងនិងចូលរួមលេង ក្នុងនោះសង្កេតឃើញថាទេសចរបរទេសជាច្រើនបានចាប់អារម្មណ៍និងចូលរួមលេងផងដែរ។
ក្នុងឱកាសពិសេសបុណ្យចូលឆ្នាំប្រពៃណីជាតិខ្មែរឆ្នាំនេះក្រោមការផ្តួចផ្តើមរបស់ឯកឧត្តមបណ្ឌិត អភិបាលខេត្ត និងលោកជំទាវ បានរៀបចំកម្មវិធីវេចនំដូចតាខ្មែរ នំត្នោត ដើម្បីរំលឹក ឱ្យដឹងអំពីអត្តសញ្ញាណជាតិដែលខេត្តកំពង់ស្ពឺជាខេត្តដែលសំបូរដើមត្នោតស្រាប់ សកម្មភាពនេះដែរស្តែងឃើញថាយុវជន យុវនារី មន្រ្ដីរាជការជាច្រើនបានចូលរួមរួបរួមសាមគ្គីគ្នាធ្វើ យល់ដឹងអំពីសង្វាក់ផលិតកម្មនំ លើសពីនេះចែកជូនភ្ញៀវទេសចរជាតិ និងអន្តរជាតិបានញាំដោយសេរី ស្គាល់រសជាតិ នំខ្មែរកេរដូនតាជាង ១,០០០,០០០នំ ថែមទៀតផងដែរ។
គួររំលឹកថានៅថ្ងៃទី១ នៃពិធីបុណ្យចូលឆ្នាំថ្មីប្រពៃណីជាតិនិងខេត្តកំពង់ស្ពឺមានភ្ញៀវទេសចរណ៍ចូលមកទស្សនាកម្សាន្តមាន ប្រមាណជិត៤០មុឺននាក់ និងថ្ងៃទី២ទទួលបានភ្ញៀវទេសចរណ៍ចូលមកទស្សនាកម្សាន្តមាន ប្រមាណ ៦០មុឺននាក់ ចំណែកថ្ងៃទី៣ ទទួលបានភ្ញៀវទេសចរណ៍ចូលមកទស្សនាកម្សាន្តមាន ប្រមាណ៧០៩,០០០នាក់៕
ប្រភពមន្ទីរព័ត៌មានខេត្តកំពង់ស្ពឺ
