រាជធានីភ្នំពេញ៖ រថយន្តដឹកសំរាម របស់ក្រុមហ៊ុន យីហោ សារុំត្រេឌីង ដែលបានធ្វើសកម្មភាព ដឹកជញ្ជូនសំរាមយកទៅស្តុកទុកនៅតាមផ្ទះ និងតាមគំនរសំរាមសំណល់ឧស្សាកម្ម និងសំណល់គ្រោះថ្នាក់ត្រូវបានគេដឹកយកទៅចាក់ចោលពាសវាលពាសកាលនៅតាមទីសារធារណៈ ក្នុងដីស្រែ ដីចំការនានា នៅក្នុងភូមិស្នួលខ្ពស់ ភូមិកប់អំបិល និងភូមិព្រៃកុដ្ឋ ក្នុងសង្កាត់កំបូល ខណ្ឌកំបូល រាជធានីភ្នំពេញ និងមានការព្រួយបារម្ភប៉ះពាល់សុខភាព និងការរស់នៅរបស់ពួកគាត់។ ប្រជាពលរដ្ឋបានស្នើសុំអាជ្ញាធរ និងមន្ត្រីជំនាញចុះពិនិត្យ និងមានចំណាត់ការលើជនអាណាមិកដែលធ្វើសកម្មភាពដឹកជញ្ជូនសំរាមសំណល់ឧស្សាកម្ម និងសំណល់គ្រោះថ្នាក់យកទៅចាក់ចោលពាសវាលពាសកាលនេះផង។
ប្រជាពលរដ្ឋបានលើកឡើងថា ជារៀងរាល់ថ្ងៃគេបានឃើញក្រុមរថយន្តប្រភេទដឹកទំនិញដែលមានដាក់ស្លាកយីហោ ក្រុមហ៊ុន សារុំ ត្រេឌីង ដឹកសំរាមយកទៅស្តុកទុកតាមផ្ទះរាប់ឆ្នាំមកហើយ។ ការដឹកជញ្ជូននោះមានរថយន្តភាគច្រើនដឹកសំពីងសំពោង និងមិនមានការវេចខ្ចប់បានត្រឹមត្រូវផងដែរ។ សំរាមដែលដឹកយកទៅស្តុកទុកមានដូចជា កំទេចក្រណាត់ កំទេចជ័រគ្រប់ប្រភេទ ធុងជរ័ ធុងដែក មានកំឈួលជះក្លិនចេញមកក្រៅដែលពួកគាត់សង្ស័យថា ជាសារធាតុគីមី។ចំណែកនៅតាមទីសាធារណៈ ដូចជា ដីស្រែ ចំការ ក៏មានសំរាម និងមានកាកសំណល់ច្រកក្នុងបាវ និងការ៉ុងមិនដឹងថាជាសំណល់អ្វីនោះទេ?។
ពាក់ព័ន្ធនិងការស្នើសុំនេះ ក្រុមអ្នកសារព័ត៌មានយើងបានចុះទៅដល់មូលដ្ឋានជួបជាមួយប្រជាពលរដ្ឋដែលប្រកបរបរដឹកសំរាម ដោយពួកគាត់មិនបានសហការអោយថតសម្ភាសន៍នោះទេ ប៉ុន្តែបានលើកឡើងថា ពួកគាត់បានទទួលម៉ៅការដឹកជញ្ជូនសំរាមតាមបណ្តារោងចក្រ សហគា្រស និងសិប្បកម្មនានា ពីក្រុមហ៊ុនសារុំ ត្រេឌីង យកមកស្តុកនៅផ្ទះ ដើម្បីញែកយកអេតចាយលក់ រកកំរៃប្រកបរបរចិញ្ចឹមជិវិត។ ចំពោះសំរាម និងកាកសំណល់ច្រកបាវ ការ៉ុងនៅតាមទីសារធារណៈ ដីស្រែ ដីចំការពួកគាត់អត់ដឹងទេ។
ពាក់ព័ន្ធនឹងការលើកឡើងរបស់ប្រជាពលរដ្ឋខាងលើ លោក ឃឹម ស៊ុនសូដា អភិបាល នៃគណៈអភិបាលខណ្ឌកំបូលបានប្រាប់អ្នកសារព័ត៌មានយើងតាមទួរសព្ទ័នៅព្រឹកថ្ងៃទី២៩ ខែកក្កដាឆ្នាំ២០២៦នេះថា លោកនឹងចាត់កំលាំងចុះចាប់ឃាត់ខ្លួនប្រសិនបើឃើញមានករណីនេះ។ លោកមិនបានបកស្រាយជុំវិញបញ្ហាជនអនាមិកដឹកសំរាមយកទៅចាក់ចោលពាសវាលពាសកាលនោះទេ លោកបានបញ្ជាក់ថា លោកកំពុងជាប់ប្រជុំ។
ចំណែក លោក គៀត រង្ស៊ី ប្រធានមន្តីរបរិស្ថានរាជធានីភ្នំពេញបានប្រាប់អ្នកសារព័ត៌មានយើងតាមទូរសព្ទ័នៅព្រឹកថ្ងៃទី២៩ ខែកក្កដាឆ្នាំ២០២៦នេះដែរថា បើសិនមានករណីដឹកសំរាមយកទៅចាក់ចោលចោលពាសវាលពាសកាលស្នើអោយក្រុមអ្នកសារព័ត៌មានជួយថតរាយការណ៍មក លោកនឹងមានចំណាត់ការបន្ទាន់លើរឿងនេះ។
ការឆ្លើយតបរបស់លោកអភិបាលខណ្ឌកំបូល និងលោកប្រធានមន្ទីរបរិស្ថានរាជធានីភ្នំពេញប្រជាពលរដ្ឋក៏នៅតែបង្ហាញពីក្តីបារម្ភថា អាជ្ញាធរ និងមន្ត្រីជំនាញនិយាយឱ្យតែរួចពីមាត់ មិនយកចិត្តទុកដាក់ដោះស្រាយ។ ពីព្រោះករណីជនអនាមិកដឹកសំរាមចាក់ចោលពាសវាលពាសកាលនេះគឺកើតឡើងរាប់ឆ្នាំមកហើយ ពោលគឺបានកើតឡើងតាំងពីទីលានចាក់សំរាមរបស់ក្រុមហ៊ុនសារុំត្រេឌីងបានបិទមកម្លេះ។ ប្រជាពលរដ្ឋបាននិយាយថា វាជារឿងដដែលៗ មិនដែលមានអាជ្ញាធរ និងមន្ត្រីជំនាញណាចុះមកចាត់វិធានការផង បើទោះបីកន្លងមកធ្លាប់មានសារព័ត៌មានក្នុងស្រុកបានចុះផ្សាយជុំវិញការចាក់សំរាមចោលពាសវាលពាសកាលយ៉ាងណាក៏ដោយ។
ទាក់ទងទៅនឹងសំរាមដែលប្រជាពលរដ្ឋដឹកយកទៅស្តុកទុកតាមផ្ទះនោះ ក៏ត្រូវបានមន្ត្រីបរិស្ថានមួយចំនួនសុំមិនបញ្ចេញឈ្មោះបានទម្លាយអោយដឹងថា សំរាមទាំងនោះ មានលាយឡំសំណល់ប្រឈមគ្រោះថ្នាក់ ក្នុងនោះក៏មានធុងជ័រ ធុងកាវ ដែលមានសារធាតុគីមីផងដែរ ។ ចំណែកកាកសំណល់ច្រកក្នុងបាវ ការ៉ុងដែលត្រូវបានគេប្រទះឃើញនៅតាមទីសាធារណៈ នៅក្នុងដីស្រែ ដីចំការនោះ គឺជាសំណល់ភក់ប្រភេទសំណល់គ្រោះថ្នាក់ ។
ជុំវិញការចុះផ្សាយខាងលើនេះបើមានប្រតិកម្មពីរភាគីណាមួយនោះ.អង្គភាពសារព័ត៌មានយើងនិងរង់ចាំទទួលធ្វើការបកស្រាយនៅរៀងរាល់ម៉ោងធ្វើការ..សូមអរគុណ៕
