ខេត្តកំពង់ស្ពឺ÷ ផ្ទុះរឿងពុករលួយនៅក្បែរស្នាក់ការរងឧទ្យាននុរៈស្រែកិន ស្ថិតនៅក្នុងភូមិស្រែកិន ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ. ខណៈក្រុមឈ្មួញដឹកជញ្ជូនឈើកំពុងលាត្រដាងពីទង្វើខុសឆ្គងរបស់មន្ត្រីបរិស្ថានប្រចាំការនៅច្រកស្នាក់ការចាំយាម.(ស្រែកិន)។
សេចក្តីរាយការណ៍ តាមបណ្តាញផ្សព្វផ្សាយព័ត៌មាន ក៏មានរបាយការណ៍ស៊ើបអង្កេតនានា និងសក្ខីកម្មរបស់ប្រជាសហគមន៍ ក៏ដូចជាសេចក្តីជូនដំណឹងនិងអំពាវនាវរបស់រដ្ឋបាលស្រុកឱរ៉ាល់.ដែលបង្ហាញថាព្រៃឈើក្នុងដែនជម្រកសត្វព្រៃភ្នំឱរ៉ាល់ ខេត្តកំពង់ស្ពឺ នៅតែរងការបំផ្លិចបំផ្លាញនឹងធ្វើសកម្មភាពដឹកជញ្ជូនចេញជារៀងរាល់ថ្ងៃ ហាក់គ្មានការថមថយបន្តិចសោះឡើយ។
ជាក់ស្តែងនៅយប់ថ្ងៃទី២៨ ឈានចូលថ្ងៃទី២៩ ខែកក្កដា ឆ្នាំ២០២៦រំលងអាធ្រាតនេះ ឈើឃ្នៀប្រមាណជាងដប់ម៉ែត្រត្រីគុណ ត្រូវបានដឹកជញ្ជូនដោយគោយន្តកន្ត្រៃចំនួន០៣គ្រឿង ចេញពីភូមិស្រែកិន ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ កាត់មុខដែនជម្រកសត្វព្រៃភ្នំឱរ៉ាល់ស្នាក់ការរងឧទ្យានុរក្សស្រែកិន ដែលមានលោក ចាន់ ជាប្រធានស្នាក់ការ បានយ៉ាងរលូនដោយពុំមានការទប់ស្កាត់និងបង្ក្រាបពីលោកប្រធានស្នាក់ការស្រែកិន និងមន្ត្រីដែលបានដាក់ស្នាក់ការចាំយាមឈរជើងនៅតំបន់នោះឡើយ បើទោះបីជាសំលេងគោយន្តកន្ត្រៃ លាន់ផ្អើលអស់ព្រៃព្រឹក្សា ស្ទើរបែកក្រដាសត្រចៀកយ៉ាងណាក៏ដោយ ក៏អស់លោកដេកគងថ្ងាស់ធ្វើមិនដឹងមិនឮទាល់តែសោះ ហាក់ដូចត្រូវសណ្ដំមន្តអាគមគាថា ពីក្រុមឈ្មួញ ។
មួយវិញទៀតយើងមិនបានដឹងថា មានឈើប៉ុន្មានទៀត ដែលពួកឈ្មួញដឹកទៅលក់ជារៀងរាល់ថ្ងៃនោះ.? ។
ជាការពិតណាស់ ! មានហេតុផលគ្រប់គ្រាន់ ដែលបញ្ជាក់ថា: ការទប់ស្កាត់ជំនួញឈើខុសច្បាប់មិនជាការពិបាករហូតដល់គ្រប់គ្រងមិនបាននោះទេ។
👉សំណួរសួរថា៖ តើហេតុអ្វីបានជាឈ្មួញអាចចូលទៅកាប់ឈើបាន? តើហេតុអ្វីបានជាឈើអាចចេញពីដែនជម្រកសត្វព្រៃរួច? និងតើហេតុអ្វីបានជាឈើអាចចរាចរណ៍ដោយខុសច្បាប់ឆ្លងកាត់ស្នាក់ការបរិស្ថាន ស្នាក់ការរដ្ឋបាលព្រៃឈើ និងស្នាក់ការរបស់អាជ្ញាធរពាក់ព័ន្ធ ដែលមានភារកិច្ចទប់ស្កាត់ និងបង្ក្រាបបទល្មើសបានយ៉ាងងាយបែបនេះ? បើសូម្បីតែគ្រឿងញៀន ដែលគេអាចលាក់រហូតដល់ក្នុងពោះ ក៏គង់តែសមត្ថកិច្ចបង្ក្រាបគ្រឿងញៀនចាប់បាន ។ ចុះការកាប់ និងដឹកជញ្ជូនឈើ ដែលគេត្រូវការមធ្យោបាយយ៉ាងច្រើនសន្ធឹកសន្ធាប់ ហើយត្រូវដឹកតាមឡាន តាមគោយន្តកន្ត្រៃ និងតាមផ្លូវថ្នល់សោះ ហេតុអ្វីមិនអាចចាប់បាន..? ។
បើនិយាយថា សមត្ថកិច្ចមិនអាចចូលដល់ព្រៃជ្រៅដើម្បីពិនិត្យមើលការកាប់ព្រៃឈើរបស់ឈ្មួញបានទេនោះ វារឹតតែជារឿងមិនអាចជឿបានទៅទៀត។ មិនអាចជឿបាន ដោយហេតុថា សូម្បីប្រជាសហគមន៍ក៏អាចចូលដល់ទីតាំងកាប់ឈើបានដែរ។ បើទោះជាមិនបាច់ចូលព្រៃក៏គេអាចទប់ស្កាត់ឈើ ដែលចរចាចរណ៍តាមដងផ្លូវបានយ៉ាងងាយផងដែរ។
តាមពិត ការកាប់ឈើមិនមែនជារឿងពិបាកនឹងដឹងនោះទេ កុំឱ្យតែមន្ត្រីយើង រួមគំនិតជាមួយចោរលួចបំផ្លាញធនធានធម្មជាតិរបស់រដ្ឋទៅ វាចប់ហើយ។សូម្បីតែប្រជាសហគមន៍ក៏អាចមើលឃើញសកម្មភាពកាប់បំផ្លាញព្រៃឈើយ៉ាងច្បាស់ដែរ ហើយពួកគេតែងតែនាំគ្នាចូលព្រៃដើម្បីបង្អាក់សកម្មភាពនេះទៀតផង។ ប៉ុន្តែ អ្វីដែលគួរឲ្យកត់សម្គាល់នោះគឺ មន្ត្រីបរិស្ថាន មន្ត្រីរដ្ឋបាលព្រៃឈើ អាជ្ញាធរពាក់ព័ន្ធ។ បែរជាមិនអើពើទៅវិញ។ ទាំងនេះជាកញ្ចក់ឆ្លុះបញ្ចាំង បានអំពីអ្វីដែលនៅពីក្រោយវាំងនននៃជំនួញឈើខុសច្បាប់ នៅក្នុងខេត្តកំពង់ស្ពឺ។
នៅមានមូលហេតុច្រើនយ៉ាង ដែលនាំឲ្យជំនួញឈើក្លាយជាបញ្ហាមិនអាចគ្រប់គ្រងបាន។ មូលហេតុសំខាន់បំផុតគឺ ការឃុបឃិត គ្នាជាខ្សែបណ្តាញ រវាងឈ្មួញរកស៊ីឈើជាមួយអាជ្ញាធរមានសមត្ថកិច្ចខិលខូចមួយចំនួន ។ មូលហេតុសំខាន់មួយទៀតគឺ ឈ្មួញអ្នករកស៊ីឈើ ច្រើនតែជាអ្នកមានឥទ្ធិពល ឬ មានខ្នងបង្អែករឹងមាំ ។ ក្នុងករណីនេះ សមត្ថកិច្ចដែនដី គ្មានជម្រើសអ្វីក្រៅពី ធ្វើ គ ធ្វើថ្លង់ នោះឡើយ ពីព្រោះតែ ពួកគេខ្លាចអំណាចរបស់មន្ត្រី អ្នកមានបុណ្យស័ក្តិធំជាងខ្លួន។ទាំងអស់នេះ គឺជាមូលហេតុសំខាន់ៗដែលធ្វើឲ្យឈ្មួញឈើមានឥទ្ធិពលជាងបទបញ្ជារបស់ថ្នាក់ដឹកនាំដូច្នេះទៅវិញ។
👉ព័ត៌មានមិនមែនជាភស្តុតាងនោះទេ.! តែវាជាតម្រុយឈានទៅរកភស្តុតាង ដែលប្រភពព័ត៌មាននេះសូមឯកឧត្តម ទេសរដ្ឋមន្ត្រី ឱម យិនទៀង ប្រធានអង្គភាពប្រឆាំងអំពើពុករលួយ មិនគួរមើលរំលងនោះទេ គួរតែ បើកការស៊ើបអង្កេត ឲ្យបានស៊ីជម្រៅ ទៅលើក្រុមឈ្មួញទាំងនោះ និងមន្ត្រីពាក់ព័ន្ធមួយចំនួនទៀតនៅក្នុងខេត្តកំពង់ស្ពឺ។
ករណីនេះដែលមហាជនដែលស្រឡាញ់ធនធានធម្មជាតិរង់ចាំអ៊ុតមើល តើលោកប្រធានស្នាក់ការស្រែកិន អាចប្រឈមទៅនឹងច្បាប់ស្ដីពីក្រមបរិស្ថាន ដែរឬយ៉ាងណា ខណៈបទល្មើសចរាចរណ៍កាត់មុខស្នាក់ការរបស់ខ្លួនគ្រប់គ្រងយ៉ាងអណាធិបតេយ្យដូច្នេះ។
ជុំវិញការចរាចរណ៍ដឹកឈើចេញពីដែនឧទ្យានុរៈស្នាក់ការស្រែកិន ខាងលើនេះមហាជនដែលស្រឡាញ់ធនធានធម្មជាតិទូទាំងប្រទេស សំណូមពរយ៉ាងទទួចដល់ឯកឧត្តមបណ្ឌិត ជាម ចាន់សោភ័ណ្ឌ អភិបាលនៃគណៈអភិបាលខេត្តកំពង់ស្ពឺ និងគោរពស្នើសុំដល់ឯកឧត្តមបណ្ឌិត អ៊ាង សុផល្លែត រដ្ឋមន្ត្រីនៃក្រសួងបរិស្ថាន មេត្តាទាន ចាប់កម្លាំងក្រោមឱវាទ ធ្វើអធិការកិច្ច ចំពោះការបណ្ដែតបណ្ដោយបើកដៃឲ្យមានការចរាចរ ដឹកជញ្ជូនផលអនុផលព្រៃឈើចេញពីដែនសមត្ថកិច្ចខ្លួនគ្រប់គ្រងខាងលើនេះផងទាន សូមអរគុណ ៕
