សម្តេចតេជោ ហ៊ុន សែន ដាស់តឿន អាជ្ញាកណ្តាលកីឡាប្រដាល់នៅសង្វៀនទូរទស្សន៍ ត្រូវមានភាពយុត្តិធម៌

ភ្នំពេញ៖ សម្តេចតេជោ ហ៊ុន សែន នៅយប់ថ្ងៃទី១១ ខែកក្កដា ឆ្នាំ២០២១នេះ បានសរសេរសារផ្ទាល់ដៃក្នុងនាមជាពលរដ្ឋម្នាក់ដែលស្រឡាញ់វិស័យកីឡា ដាក់ជាសំណួរផង និងជាការក្រើនរំលឹកផងចំពោះអាជ្ញាកណ្តាលកីឡាប្រដាល់ ដែលកាត់ក្តីខុសក្បួន លើការប្រដាល់មួយគូនៅសង្វៀនទូរទស្សន៍មួយ ហើយទោះបីសម្តេចមិនសរសេរចំ ប៉ុន្តែគេអាចយល់បានថាជាការប្រដាល់នៅទូរទស្សន៍ CNC រវាងកីឡាករ ម៉ឺន មេឃា និងកីឡាករ ឃីម បូរ៉ា។

សម្តេចតេជោ ហ៊ុន សែន គូសបញ្ជាក់ថា៖ អ្វីដែលខ្ញុំសុំ គឺអាជ្ញាកណ្តាលត្រូវតែ មានយុត្តិធម៌ក្នុងខ្លួន»។ សម្តេចតេជោ ហ៊ុន សែន សរសេរសារទាំងស្រុងក្នុងអត្ថន័យថា៖ «ដោយអត់ទ្រាំមិនបានខ្ញុំសូម ចេញមកនិយាយក្នុងនាមជាពលរដ្ឋខ្មែរម្នាក់ ដែលស្រឡាញ់វិស័យកីឡា។ តើយើងត្រូវពង្រឹងអាជ្ញាកណ្តាលកីឡា ប្រដាល់ឬត្រូវបង្កើតក្បាច់គុណថ្មីដោយកំណត់លក្ខណ្ឌប្រកួតថ្មីដោយវាយខុសក្បួនហើយមិនព្រមប្រកាសលទ្ធផលនិងលើកពេលទៅប្រកួតនៅពេលក្រោយ។ តើឱ្យកីឡាប្រដាល់យើងឈានទៅមុខម្តេចបាន បើសហព័ន្ធកីឡាប្រដាល់យើងទុក ឱកាសឱ្យអាជ្ញាកណ្តាលធ្វើបែបនេះ?។

សម្តេចតេជោ ហ៊ុន សែន បន្ថែមថា៖  តើមានក្បួនមកពីណាវាយខុសក្បួនខ្នាតហើយសម្រេចលើកពេលទៅប្រកួតពេលក្រោយ សូម្បីតែបាល់ទាត់បើទាត់ខុសត្រូវពិន័យកាតលឿង ឬកាតក្រហមដោយ ដេញចេញឬពិន័យបាល់១១ម៉ែត្រភ្លាមៗដោយមិនទុកពេលឱ្យតវ៉ានោះទេ។ សម្តេចតេជោ ហ៊ុនសែន បញ្ជាក់ថា«ខ្ញុំមិនបន្ទោសកីឡាករទេ ព្រោះពួកគាត់ស្តាប់តាមការកាត់ក្តីរបស់អាជ្ញាកណ្តាល។ អ្វីដែលខ្ញុំសុំ គឺអាជ្ញាកណ្តាលត្រូវតែ មានយុត្តិធម៌ក្នុងខ្លួន៕