អភិបាលខេត្តកំពង់ស្ពឺអំពាវនាវឱ្យពលរដ្ឋប្រកាន់ខ្ជាប់វិធានសុខាភិបាលក្នុងឱកាសចូលរួមកាន់បិណ្ឌ

កំពង់ស្ពឺ៖ អភិបាលខេត្តកំពង់ស្ពឺ ឯកឧត្តម វ៉ី  សំណាង បានអំពាវនាវឱ្យពលរដ្ឋប្រកាន់ខ្ជាប់នូវវិធានការសុខាភិបាលនិងវិធានការ៣កុំ ៣ការពារក្នុងឱកាសចូលរួមកាន់បិណ្ឌនិងភ្ជុំបិណ្ឌក្នុងឆ្នាំនេះដើម្បីកុំឱ្យមានការឆ្លងនិងចម្លងជំងឺកូវីដ-១៩។ការអំពាវនាវនេះធ្វើឡើងគ្រាដែលលោកបានដឹកនាំមន្ត្រីក្រោមឱវាទចូលរួមកាន់បិណ្ឌវេនទី២ក្នុងវត្តម្រុំជើងនាថ្ងៃទី២៣ខែកញ្ញាឆ្នាំ២០២១។

ឯកឧត្តម វ៉ី សំណាង លើកឡើងថាក្នុងឱកាសបុណ្យភ្ជុំបិណ្ឌនេះមានបងប្អូនប្រជាពលរដ្ឋមកពីគ្រប់ទីកន្លែងដើម្បីជួបជុំក្រុមគ្រួសារ សាច់ញាតិ និងញាតិសណ្តាន។ក្នុងការជួបជុំនេះដែរពួកគេក៏បាននាំគ្នាធ្វើម្ហូបអាហារ នំចំណី ទៅវត្តប្រគេនព្រះសង្ឃដើម្បីឧទ្ទិសមគ្គផលកុសលទាំងអស់នោះទៅបុព្វការីជន ញាតិការទាំង៧សណ្តានរបស់ពួកគេ ដូច្នេះវាជាឱកាសដែលងាយក្នុងការចម្លងនិងឆ្លងវ៉ីរុសជំងឺកូវីដ-១៩។

ឯកឧត្តម វ៉ី សំណាង បញ្ជាក់ថាដើម្បីផ្តាច់ឬសគល់មិនឱ្យមានការឆ្លងជំងឺកូវីដ-១៩ក្នុងឱកាសកាន់បិណ្ឌ និងភ្ជុំបិណ្ឌឆ្នាំនេះគឺបងប្អូនប្រជាពលរដ្ឋទាំងអស់ត្រូវតែបំពេញកាតព្វកិច្ចពាក់ម៉ាសឱ្យបានជាប់ជានិច្ច រស់នៅតាមបែបគន្លងថ្មី ជៀសវាងការប្រមូលផ្តុំ ។ហើយគ្រប់វត្តអារាមត្រូវមានការផ្សព្វផ្សាយដាស់តឿនរំលឹកដល់ពុទ្ធបរិស័ទដែលមិនបានគោរពតាមការណែនាំរបស់ក្រសួងសុខាភិបាលនិងរាជរដ្ឋាភិបាល។

សូមបញ្ជាក់ផងដែរថាបុណ្យភ្ជុំបិណ្ឌជាពិធីបុណ្យមួយដែលធំជាងគេនៅក្នុងចំណោមពិធីបុណ្យទាំងអស់សម្រាប់អ្នកកាន់ព្រះពុទ្ធសាសនា។បងប្អូនកូនចៅ សាច់ញាតិសន្ដានទាំងអស់ ទោះនៅទីជិតឬទីឆ្ងាយ តែងតែធ្វើដំណើរទៅជួបជុំគ្នាពិសេសឪពុកម្ដាយនៅស្រុក កំណើត ដើម្បីរៀបចំម្ហូបអាហារ បាយសម្ល ចង្ហាន់យកទៅប្រគេនព្រះសង្ឃដែលគង់នៅវត្តអារាមក្នុងឱកាសនេះ។ពិធីបុណ្យកាន់បិណ្ឌ ភ្ជុំបិណ្ឌឆ្នាំ២០២១នេះ នឹងប្រព្រឹត្តទៅចាប់ពីថ្ងៃ១រោច ដល់ថ្ងៃ ១៤រោច ខែភទ្របទ ត្រូវនឹងថ្ងៃទី២២កញ្ញា ដល់ថ្ងៃទី៦ ខែតុលា ឆ្នាំ២០២១។