អភិបាលខេត្តព្រះសីហនុចុះសំណេះសំណាលជាមួយលោកគ្រូ អ្នកគ្រូ និងក្រុមយុវជនស្ម័គ្រចិត្តក្នុងយុទ្ធនាការចាក់វ៉ាក់សាំងបង្ការជំងឺកូវីដ-១៩

ព្រះសីហនុ៖  ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ នៅព្រឹកថ្ងៃសៅរ៍ទី០២ ខែតុលា ឆ្នាំ២០២១ បានសំណេះសំណាលជាមួយលោកគ្រូ អ្នកគ្រូ និងក្រុមយុវជនស្ម័គ្រចិត្ត ដែលបានចូលរួមក្នុងយុទ្ធនាការចាក់វ៉ាក់សាំងបង្ការជំងឺកូវីដ-១៩ ក្នុងភូមិសាស្ត្រខេត្តព្រះសីហនុ ចំនួន ៣២០នាក់ ដោយមានការចូលរួមពីលោកអភិបាលរងខេត្ត លោកនាយក នាយករងរដ្ឋបាលសាលាខេត្ត ស្នងការដ្ឋាននគរបាលខេត្តមេបញ្ជាការកងរាជអាវុធហត្ថខេត្ត អភិបាលក្រុងព្រះសីហនុ និងប្រធានមន្ទីរពាក់ព័ន្ធ។

នាឱកាសនោះឯកឧត្តមអភិបាលបានកោតសរសើរចំពោះលោកគ្រូ អ្នកគ្រូ និងក្រុមយុវជនស្ម័គ្រចិត្ត ដែលបានចូលរួមជាមួយរាជរដ្ឋាភិបាល និងអាជ្ញាធរខេត្ត ក្នុងយុទ្ធនាការចាក់វ៉ាក់សាំងជូនប្រជាពលរដ្ឋ កុមារ និងយុវវ័យ ដើម្បីបង្កើតភាពស៊ាំ កាត់បន្ថយការឆ្លងរាលដាលនៃជំងឺកូវីដ-១៩ ក្នុងសហគមន៍ និងកាត់បន្ថយហានិភ័យដល់អាយុជីវិតប្រជាពលរដ្ឋខេត្តរបស់យើង។

ឯកឧត្តមអភិបាលខេត្តក៏បានពាំនាំការនឹករលឹក និងផ្តាំផ្ញើសួរសុខទុក្ខពីសម្តេចតេជោ ហ៊ុន សែន នាយករដ្ឋមន្ត្រៃ នៃព្រះរាជាណាចក្រកម្ពុជា ជូនចំពោះលោកគ្រូ អ្នកគ្រូ និងក្រុមយុវជនស្ម័គ្រចិត្តរបស់យើង ដែលបានចូលរួមយ៉ាងផុលផុសក្នុងសកម្មភាពបិទខ្ទប់ និងសកម្មភាពជាច្រើនទៀត ពិសេសក្នុងយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋ កុមារ និងយុវវ័យនាពេលកន្លងមក។

ទន្ទឹមនោះសម្តេចតេជោ បានផ្តល់ស្បៀងអាហារមករដ្ឋបាលខេត្តព្រះសីហនុ ចំនួន ៣២.០០០ឈុត សម្រាប់ចែកជូនប្រជាពលរដ្ឋក្នុងអំឡុងបិទខ្ទប់។ រាជរដ្ឋាភិបាលក៏ខិតខំរកវ៉ាក់សាំងចាក់ជូនប្រជាពលរដ្ឋ ដើម្បីបង្កើនភាពស៊ាំកាត់បន្ថយការឆ្លង និងស្លាប់ដោយសារជំងឺកូវីដ-១៩ ក្នុងនោះក៏បានបើកយុទ្ធនាការចាក់វ៉ាក់សាំងជូនប្រជាពលរដ្ឋ មន្ត្រីរាជការ កងកម្លាំងប្រដាប់អាវុធដែលមានអាយុចាប់ពី ១៨ឆ្នាំឡើង និងបន្តចាក់វ៉ាក់សាំងជូនកុមារ និងយុវវ័យ ដែលមានអាយុ ៦ឆ្នាំ ដល់ក្រោម ១២ឆ្នាំ ចំនួន ២៥.០០០នាក់សម្រាប់ខេត្តព្រះសីហនុ។ ដោយសារការដឹកនាំ និងដាក់ចេញនូវយុទ្ធសាស្ត្រ និងយុទ្ធវិធីត្រឹមត្រូវច្បាស់លាស់ របស់សម្តេចតេជោ ក្នុងការប្រយុទ្ធប្រឆាំងនឹងជំងឺកូវីដ-១៩ ទទួលបានលទ្ធផលល្អ។ សូមឱ្យអ្នកស្ម័គ្រខេត្តព្រះសីហនុបន្តចូលរួមជាមួយសម្តេចតេជោ ក្នុងបេសកកម្មចាក់វ៉ាក់សាំងជូនប្រជាពលរដ្ឋទទួលបានជោគជ័យបន្ថែមទៀត។

ឯកឧត្តមអភិបាលខេត្តបានបន្តថា ជំងឺកូវីដ-១៩ បានអូសបន្លាយរយៈពេលពីរឆ្នាំមកនេះ នាំឱ្យយើងជួបវិបត្តិសេដ្ឋកិច្ចក្នុងគ្រួសារ និងសង្គមជាតិ។

ឯកឧត្តមអភិបាលខេត្ត បានបញ្ជាក់ថា រាជរដ្ឋាភិបាលបានអនុញ្ញាតឱ្យក្រសួងអប់រំ យុវជន និងកីឡា បើកសាលារៀនឡើងវិញ ដោយផ្តោតលើថ្នាក់ទី៩ និងថ្នាក់ទី១២ ដោយឡែកសម្រាប់ខេត្តព្រះសីហនុ មានសាលាចំនួន២៥ បានបើកដំណើរការរៀន និងបង្រៀនឡើងវិញដោយទទួលបានជោគជ័យ ហើយយើងនឹងបន្តបើកថ្នាក់ទី១០ និងថ្នាក់ទី១១ បន្ថែមទៀតក្រោយពិធីកាន់បិណ្ឌ ភ្ជុំបិណ្ឌរួច និងឈានទៅបន្តបើកសាលាបឋមសិក្សា និងមត្តេយ្យសិក្សាបន្ថែមទៀតនាពេលខាងមុខ។ ក្នុងនាមរដ្ឋបាលខេត្ត សូមចូលរួមអបអរសាទរសមិទ្ធផលថ្មីៗជាបន្តបន្ទាន់របស់មន្ទីរអប់រំយុវជន និងកីឡាខេត្តព្រះសីហនុ ដែលបានចូលរួមយ៉ាងសកម្មនាពេលកន្លងមក ជាមួយគណៈកម្មការប្រយុទ្ធប្រឆាំងនឹងជំងឺកូវីដ-១៩។

បន្ទាប់មកឯកឧត្តមអភិបាលខេត្ត ក៏បាននាំយកថវិការបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ឧបត្ថម្ភជូនលោកគ្រូ អ្នកគ្រូ និងយុវជនស្ម័គ្រចិត្តក្រុងព្រះសីហនុចំនួន ៣២០នាក់ ក្នុងម្នាក់ទទួលបានថវិកា ២០ម៉ឺនរៀល៕