តើលោក សំ រិទ្ធី នាយផ្នែករដ្ឋបាលព្រៃឈើរមាស អាចរួចពីសំណាញ់ច្បាប់ដែរឬទេ ក្រោយពីមានរឿង អាស្រូវជាច្រើន នាពេលថ្មីៗនេះ ក៏មានដីកាបង្គាប់ឲ្យចូលខ្លួន របស់សាលាដំបូងខេត្តកំពង់ឆ្នាំង ថែមទៀតផង ដើម្បីចូលខ្លួនបំភ្លឺនៅថ្ងៃទី 20 ខែតុលា ឆ្នាំ 2021 នេះ ទាក់ទិននឹងការសមគំនិត ក្នុងអំពើឈូសឆាយ ដីព្រៃសហគមន៍ដោយគ្មានច្បាប់អនុញ្ញាត

ខេត្តកំពង់ឆ្នាំង៖ លោក សំ រិទ្ធី មុខរបរនាយផ្នែករដ្ឋបាលព្រៃឈើរមាស ទីលំនៅសព្វថ្ងៃស្រុកទឹកផុស ខេត្តកំពង់ឆ្នាំង មានដីកាបង្គាប់ឱ្យចូលខ្លួន របស់សាលាដំបូងខេត្តកំពង់ឆ្នាំង ចេញដោយចៅក្រមស៊ើបសួរ សោម វីរៈ កាលពីថ្ងៃអង្គារ 11កើត ខែភទ្របទ ឆ្នាំឆ្លូវ ត្រីស័ក ពុទ្ធសករាជ 2565 ត្រូវនឹងថ្ងៃទី 7 ខែកញ្ញា ឆ្នាំ 2021 ឲ្យចូលបង្ហាញខ្លួន ចំពោះមុខចៅក្រមស៊ើបសួរ បន្ទប់ (ឆ)នៃសាលាដំបូងខេត្តកំពង់ឆ្នាំង ក្នុងនាមជាជនត្រូវចោទ នៅថ្ងៃទី 20 ខែតុលា ឆ្នាំ 2021 វេលាម៉ោង 2:30 នាទីរសៀលថ្ងៃស្អែកនេះ។

ដោយបានឃើញសំណុំរឿងព្រហ្មទណ្ឌលេខ 748 ថ្ងៃទី 3 ខែកញ្ញា ឆ្នាំ 2021 និងបានឃើញដីកាសន្និដ្ឋានបញ្ជូនរឿងឲ្យស៊ើបសួរលេខ 611/21 ចុះថ្ងៃទី 4 ខែកញ្ញា ឆ្នាំ 2021 របស់តំណាងអយ្យការអមសាលាដំបូងខេត្តកំពង់ឆ្នាំង បានឃើញសំណុំរឿងស៊ើបសួរលេខ 403 ចុះថ្ងៃទី 4 ខែកញ្ញា ឆ្នាំ 2021 បង្គាប់មកឈ្មោះ សំ រិទ្ធី ភេទប្រុសអាយុ 46 ឆ្នាំ ជនជាតិខ្មែរ មុខរបរនាយផ្នែករដ្ឋបាលព្រៃឈើរមាស ទីលំនៅសព្វថ្ងៃស្រុកទឹកផុស ខេត្តកំពង់ឆ្នាំង។

ដើម្បីសាកសួរពីដំណើររឿង សមគំនិតក្នុងអំពើឈូសឆាយដីព្រៃសហគមន៍ ដោយគ្មានច្បាប់អនុញ្ញាត ដែលប្រព្រឹត្តនៅចំណុចសហគមន៍ខ្សាច់ពូន ស្ថិតក្នុងភូមិខ្វិតទួលឃ្លាំង ឃុំក្បាលទឹកស្រុកទឹកផុស ខេត្តកំពង់ឆ្នាំង កាលពីថ្ងៃទី 2 ខែកញ្ញា ឆ្នាំ 2021បទល្មើសព្រហ្មទណ្ឌ ដែលមានចែងឲ្យផ្តន្ទាទោសតាមបញ្ញត្តិមាត្រា 29 នៃក្រមព្រហ្មទណ្ឌ និងមាត្រា 97 ចំណុច 6 នៃច្បាប់ស្ដីពីព្រៃឈើ។

ក្នុងករណីមិនចូលខ្លួន តាមការកំណត់ខាងលើនេះទេ ចៅក្រមនឹងចេញ ដីកាបង្គាប់ឲ្យនាំខ្លួន។

អង្គភាពយើង និង ធ្វើការផ្សាយជាបន្តចំពោះ រឿងនេះ ថាតើក្រោយពីលោក សំ រិទ្ធី បានបំភ្លឺហើយមានរឿងអ្វីកើតឡើងជាបន្តទៀត សូមបងប្អូនទាំងអស់រង់ចាំតាមដានវគ្គបន្ត សូមអរគុណ។