ខេត្តក្រចេះ÷ ប្រជាពលរដ្ឋជាច្រើនគ្រួសារបានគោរពស្នើសុំឯកឧត្តម វ៉ា ថន អភិបាលនៃគណៈអភិបាលខេត្តក្រចេះ ជួយរកយុត្តិធម៌នឹងស្នើសុំកាន់កាប់ដីដែលពួកគាត់បានអាស្រ័យផលជាយូរឆ្នាំមកហើយ ដែលមានទីតាំងជាប់នឹងព្រំប្រទល់ដីព្រៃសហគមន៍ប្រាសាទទឹកខ្មៅដែលស្ថិតនៅចំណុចស្ពានក្តា ភូមិទន្សោងធ្លាក់ ឃុំកំពង់ចាម ស្រុកសំបូរ ខេត្តក្រចេះ។
ប្រជាពលរដ្ឋបានលើកឡើងទៀតថាដីព្រៃដែលគាត់បានកាប់ស្ការរុករៀននិងបានអាស្រ័យផលជាយូរឆ្នាំមកហើយនោះត្រូវបានខាងសហគមន៍និងមេភូមិទន្សោងធ្លាក់ ហាមឃាត់មិនឱ្យកាប់រុករាននិងអាស្រ័យផលតទៀតទេ ព្រោះសំអាងថាដីព្រៃសហគមន៍ប្រាសាទទឹកខ្មៅ។
នៅថ្ងៃទី១៧ ខែមករា ឆ្នាំ២០២២ លោកពូ ចាន់ ថន រស់នៅភូមិទន្សោងធ្លាក់ ឃុំកំពង់ចាម ស្រុកសំបូរ ខេត្តក្រចេះ បានរៀបរាប់និងថ្អូញថ្អែប្រាប់អង្គភាពសារព័ត៌មានយើងឲ្យដឹងថា ដីរបស់គាត់មានបន្តិចបន្តួចនិងបានអាស្រ័យផលហើយមានដំណាំខ្លះផង គាត់មិនអាចដោះស្រាយជីវភាពឲ្យបានគ្រប់គ្រាន់នោះទេ គាត់ក៏កាប់រុករានបន្តិចបន្តួចថែមទៀត ត្រូវបានមេភូមិនិងប្រធានសហគមន៍ប្តឹងគាត់ទៅតុលាការ គាត់បាននិយាយទៀតថា មិនសមថ្នាក់ដឹកនាំនៅក្នុងភូមិបន្តិចសោះ ចំណែកមេភូមិគាត់ពិតជាមានអំណាចខ្លាំងមែនហ៊ានលក់ដីព្រៃអស់ជាច្រើនហិកតាដោយមិនខ្វល់ រីឯប្រជាពលរដ្ឋគ្រាន់តែកាប់រុករានដោយកម្លាំងបន្តិចបន្តួចដើម្បីអាស្រ័យផលត្រូវមានឈ្មោះនៅក្នុងតុលាការ តើមកពីមូលហេតុអ្វី?។
ចំណែកឯលោក ហាង ឡៃ រស់នៅភូមិទន្សោងធ្លាក់ ឃុំកំពង់ចាម ស្រុកសំបូរ ខេត្តក្រចេះ បានរៀបរាប់ប្រាប់អង្គភាពសារព័ត៌មានយើងនៅថ្ងៃដដែលនោះដែរថា ដីគាត់ដែលខាងសហគមន៍កាត់ឆ្វៀលឲ្យជាង 3ហិកតារតែគាត់ទើបនឹងរៀនបានប្រហែលជាង 70 អានឹងបានអាស្រ័យផលកន្លងមកនិងបានកាប់ឆ្ការបន្តិចបន្តួចបន្ថែមទៀត ត្រូវបានខាងសហគមន៍និងលោកមេភូមិគំរាមកំហែងចាប់វាយខ្នោះយកទៅដាក់គុក នឹងប្តឹងគាត់ទៅតុលាការចំនួនពីរលើកនឹងមិនឱ្យពួកគាត់អាស្រ័យផលកាប់រុករាន បន្តទៀតទេ។
តាមការរៀបរាប់ខាងលើ ពួកគាត់ជាជនក្រីក្រ មិនមានដីអាស្រ័យផងនិងមិនមានផ្ទះរស់នៅសមរម្យ បានលើកដៃសំពះសុំក្ដីមេត្តា គោរពស្នើសុំ ឯកឧត្តម វ៉ា ថន អភិបាលនៃគណៈអភិបាលខេត្តក្រចេះ សូមជួយដោះស្រាយ នឹងរកយុត្តិធម៌ជូនពួកគាត់ឲ្យបានអាស្រ័យផល ជាក់ស្ដែងបន្តទៀត៕
