ខេត្តរតនគិរី÷ ប្រជាពលរដ្ឋនិងមហាជន ជាច្រើនបានលើកឡើងថា កម្លាំងសមត្ថកិច្ចពាក់ព័ន្ធក្នុងខេត្តរតនគិរី គ្មានសមត្ថភាពទប់ស្កាត់និងបង្ក្រាបបទល្មើសធនធានធម្មជាតិ ខណៈបទល្មើសធនធានធម្មជាតិ កើតមានយ៉ាងពេញបន្ទុក ក្នុងខេត្តរតនគិរី គ្មានឃើញការបង្ក្រាប ដូចជារថយន្តដឹកឈើឆ្លងដែនទៅយួនខាងលើ ត្រូវបានគេស្គាល់ឈ្មោះថា ជារបស់លោក មករា ដែលជាឈ្មួញឈើដុះស្លែប្រចាំក្នុងខេត្តរតនគិរី ហើយបុគ្គលនេះផងដែរ ត្រូវបានគេនិយាយតៗគ្នាថា មិនដែលខ្លាចរអារនិងច្បាប់នោះឡើយ ព្រោះគេត្រូវរូវជាមួយជំនាញអស់ហើយ ។
តើករណីនេះ ជាភាពកំសោយរបស់លោក ញ៉ែម សំអឿន អភិបាលខេត្តឬជាការបើកភ្លើងខៀវ ដែលមហាជនបានដាក់ការសង្ស័យថា បានទទួលលាបសក្ការៈ សើមមាត់ សើមករ ទើបស្ងាត់ឈឹង មិនឃើញមានសមត្ថកិច្ច ណាមួយចុះទប់ស្កាត់និងបង្ក្រាបនោះឡើយ.?
ជុំវិញព័ត៌មានលើកឡើងខាងលើ តើជាការពិតដែរឬទេ.? ដើម្បីបញ្ចៀសនូវការភ័ន្តច្រឡំ ឬជាព័ត៌មានក្លែងក្លាយណាមួយនោះ.! អង្គភាពសារព័ត៌មានយើង ស្នើសុំឲ្យមានការបកស្រាយពីអាជ្ញាធរ និងសមត្ថកិច្ចពាក់ព័ន្ធក្នុងខេត្តរតនគិរី ដែលសារព័ត៌មានយើងស្វាគមន៍រង់ចាំទទួលការបកស្រាយនៅរៀងរាល់ម៉ោងធ្វើការ ដោយយោងច្បាប់ស្ដីពីរបបសារព័ត៌មាន។
បើតាមប្រភពពីប្រជាពលរដ្ឋក៏ដូចជាសមត្ថកិច្ចខ្លះដែលគេមិនបានសែនព្រេនឱ្យលិឌ បានឲ្យដឹងថា មួយរយ:ចុងក្រោយនេះ ឈ្មួញឈ្មោះ មករា កំពុងប្រើប្រាស់រថយន្តសាំយ៉ុងចាប់ពី ៤ គ្រឿងទៅ ៥ គ្រឿងសម្រុកដឹកជញ្ជូនឈើចេញ ពីតំបន់ភ្នុំកុក.ភូមិទាមក្រោមនៃស្រុកវើនសៃខេត្តរតនគិរីមកស្តុបទុកមួយស្របក់នៅក្នុងឃ្លាំងនៅចុះចំណោតភ្នំខាងជើងបឹងយក្សឡោម នាក្រុងបានលុងទីរួមខេត្តរតនគិរី បន្តឆ្ពោះទៅស្រុកយួនតាមច្រកអូរយ៉ាដាវ យ៉ាងពេញបន្ទុក។
ការដែលឈ្មួញឈ្មោះ មករា អាចដឹកជញ្ជូនឈើចេញទៅស្រុកយួនតាមច្រកទ្វារអន្តរជាតិអូរយ៉ាដាវ យ៉ាងរលូនគឺមានការឃុបឃិតពីសំណាក់មន្រ្តីជំនាញ និងលោក ខឹម ចិត្រា នាយប៉ុស្តិ៍នគរបាលអន្តោប្រវេសន៍ច្រកអូរយ៉ាដាវផងដែរ។
ដូច្នេះហើយទើបមានសេចក្ដីអំពាវនាវឲ្យលោក ថាវ យ៉េន មេបញ្ជាការកងរាជអាវុធហត្ថខេត្តរតនគិរី និងលោក ញ៉ែម សំអឿន អភិបាលខេត្តរតនគិរី ពិនិត្យឡើងវិញខ្លះផងជុំវិញករណីឈ្មួញឈ្មោះ មករា ដឹកជញ្ជូនឈើទៅស្រុកយួន។
តាមប្រភពដ៏ដែលបានបង្ហើមថា ឈ្មួញឈ្មោះ មករា ប្រមូលទិញឈើនៅក្នុងស្រុកវ៉ើនសៃ ហើយដឹកជញ្ជូនតាមរថយន្តសាំយ៉ុងចេញទៅស្រុកយួនតាមច្រកទ្វារអន្តរជាតិអូរយ៉ាដាវ យ៉ាងពេញបន្ទុក។ មន្រ្តីជំនាញ និងសមត្ថកិច្ចមិនហ៊ានប៉ះពាល់ឈ្មួញនេះទេ ព្រោះពួកគេមានខ្នងបង្អែករឹងមាំ ហើយជាប្រភពចំណូលរបស់មន្រ្តីធំៗមួយចំនួននៅក្នុងខេត្តរតនគិរី។
មហាជនសូមសំណូមពរដល់ឯកឧត្តមសាយសំអាល់រដ្ឋមន្ត្រីក្រសួងបរិស្ថាន និងឯកឧត្តមវេងសាខុនរដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ ព្រមទាំងឯកឧត្ដមនាយឧត្ដមសេនីយ៍សៅសុខាមេបញ្ជាការកងរាជអាវុធហត្ថលើផ្ទៃប្រទេសនិងជាប្រធានគណៈកម្មការបង្ក្រាបបទល្មើសធនធានធម្មជាតិនៅកម្ពុជា សូមមេត្តាទប់ស្កាត់និងបង្ក្រាបបទល្មើសព្រៃឈើកំពុងតែហូរចូលទៅក្នុងប្រទេសវៀតណាមបច្ចុប្បន្ននេះនៅក្នុងខេត្តរតនគិរីផងទាន!បើពុំដូច្នោះទេព្រៃឈើនៅក្នុងខេត្តរតនគិរីទាំងមូលនឹងត្រូវរលាយហិនហោចពីលើផែនដីនៅពេលឆាប់ៗនេះជាក់ជាពុំខាន សូមអរគុណ៕
