កំពង់ស្ពឺៈ ក្មេងស្រីម្នាក់ បានស្លាប់ភ្លាមៗ នៅនឹងកន្លែង ចំណែកយុវជន ម្នាក់ រងរបួសធ្ងន់ បន្ទាប់ពីម៉ូត បុកជាមួយម៉ូតូ។ ហេតុការណ៍នេះ បានកើតឡើង នៅតាម បណ្តោយផ្លូវជាតិលេខ៤ ត្រង់ចន្លោះគីឡូម៉ែត្រលេខ ៣៦-៣៧ ត្រង់ចំណុចភូមិព្រៃផ្តៅ ឃុំត្រពាំងគង ស្រុកសំរោងទង ខេត្តកំពង់ស្ពឺ កាលពីវេលាម៉ោង ៤និង១៥នាទី រសៀលថ្ងៃទី២៧ ខែមេសា ឆ្នាំ២០២២។
នគរបាលមូលដ្ឋាន បានឲ្យដឹងថាៈ ក្មេងស្រីរងគ្រោះ មានឈ្មោះ ឡេង រចនា អាយុ ១៤ ឆ្នាំ រស់នៅភូមិស្ទឹង ឃុំត្រពាំងគង ស្រុកសំរោងទង ជិះម៉ូតូម៉ាកហុងដា សេ១២៥ ពណ៌ខ្មៅ ពាក់ស្លាកលេខ កំពង់ស្ពឺ 1H 5488 (ម្នាក់ឯង) បានបើកបរពីទិសខាងកើត ទៅទិសខាងលិច មកដល់ចំណុចកើតហេតុ ខាងលើ ក៏ប៉ះគ្នាជាមួយម៉ូតូ ម៉ាកហុងដា សេ១២៥ ពណ៌ខ្មៅ ពាក់ស្លាកលេខ ស្វាយរៀង 1Q- 5773 បើកបរដោយយុវជនម្នាក់ ឈ្មោះ ស៊ឹម ភ័ក្ដ្រា អាយុ ១៨ ឆ្នាំ ស្នាក់នៅភូមិព្រៃផ្ដៅ ឃុំត្រពាំងគង ស្រុកសំរោងទង បណ្តាលឲ្យក្មេងស្រីរងគ្រោះ ស្លាប់ភ្លាមៗ នៅនឹងកន្លែងតែម្តង។ ចំណែកយុវជនម្នាក់នោះ បានរងរបួសធ្ងន់។
ប្រភពបានបន្តទៀតថាៈ ក្រោយកើតហេតុ មន្ត្រីនគរបាលជំនាញ បានហៅរថយន្តដឹកអ្នករង របួសធ្ងន់ យកទៅសង្គ្រោះ នៅឯមន្ទីរពេទ្យបង្អែក ខេត្តកំពង់ស្ពឺ។ សពក្មេងស្រី បានប្រគល់ ជូនក្រុមគ្រួសារ យកទៅធ្វើបុណ្យតាមប្រពៃណី។ ចំពោះវត្ថុតាងទាំងពីរគ្រឿង រក្សាទុកនៅ ប៉ុស្តិ៍នគរបាលរដ្ឋបាល ត្រពាំងគង រង់ចាំដោះស្រាយ នៅពេលក្រោយ៕
