តាកែវ)៖ លោក ហែម សីហបូរ៉ា មុខរបរមន្ត្រីនគរបាលស្រុកគិរីវង់ និងបក្ខពួករងបណ្ដឹងពីលោកស្រី ង៉ោញ ណី ពីបទរំលោភលំនៅដ្ឋាន ទៅតុលាកាភ្លាមៗ ក្រោយដឹកនាំកម្លាំងចម្រុះទៅព័ទ្ធផ្ទះចាប់ប្រជាពលរដ្ឋដោយគ្មានបង្ហាញដីកា។
នេះយោងតាមពាក្យបណ្ដឹងចុះថ្ងៃទី១៦ ខែមិថុនា ឆ្នាំ២០២២ របស់លោកស្រី ង៉ោញ ណី ដែលឣង្គភាពយើងខ្ញុំទទួលបាន។
សូមបញ្ជាក់ថា កាលពីថ្ងៃទី១៦ ខែមិថុនា ឆ្នាំ២០២២ម៉ោង១០ និង១០នាទីព្រឹក មានការភ្ញាក់ផ្អើលមួយបានកើតឡើងដោយមានកម្លាំងសមត្ថកិច្ចស្រុកគិរីវង់ ខេត្តតាកែវ មួយក្រុមមានទាំងឯកសណ្ឋាននិងស៊ីវិលមានគ្នាប្រហែលប្រមាណ ១០នាក់ បានធ្វេីសកម្មភាពចុះព័ទ្ធផ្ទះប្រជាពលរដ្ឋ ស្ថិតនៅភូមិភ្ងាស ឃុំអង្គប្រាសាទ ស្រុកគិរីវង់ ខេត្តតាកែវ ដោយមិនបង្ហាញដីកា។
គួរបញ្ជាក់ផងដែរថា កម្លាំងសមត្ថកិច្ចទាំង នោះគឺមានស្លៀកពាក់ ឯកសណ្ឋានខ្លះ សុីវិលខ្លះ ហើយត្រូវបានដកថយភ្លាមៗ បន្ទាប់ពីម្ចាស់ផ្ទះ សួរនាំរកដីកាពីតុលាការ។
អង្គភាពសារព័ត៌មាន ស៊ីអិនធី ហតញូយ៍យើងក្រោយពីទទួលព័ត៌មាន ពីប្រជាពលរដ្ឋឈ្មោះ ង៉ោញ ណី អាយុ៦៤ឆ្នាំ រស់នៅភូមិឃុំខាងលើ ដែលអះអាងថា ជាជនរងគ្រោះ បានបញ្ជាក់ប្រាប់ អង្គភាព ស៊ីអិនធី ហតញូយ៍យើងអោយដឹងថា គឺមានសមត្ថកិច្ចចុះព័ទផ្ទះគាត់ បម្រុងនឹងចាប់គាត់ ពិតប្រាកដមែន។
នៅវេលាម៉ោង 1:52 នាទីថ្ងៃទី 16 ខែមិថុនាឆ្នាំ 2022 យោងតាមក្រុមការងារអង្គភាពសារព័ត៌មាន ស៊ីអិនធី ហតញូយ៍ យើង បានសម្ភាសន៍ជាមួយលោក យុគ សារ៉ាត់ អធិការស្រុកគីរីវង់ តាមរយៈលេខទូរសព្ទទាក់ទិននឹងករណីខាងលើ លោកបានតបវិញថា ពិតជាមានករណីសមត្ថកិច្ចចុះទៅព័ទ្ធផ្ទះនោះមែន ដោយសារមានដីកាចាប់ខ្លួនពីតុលាការ ទាក់ទិននឹងរឿងដីធ្លី។
ក្រោយមក នៅវេលាម៉ោង 2:02 នាទីរសៀល ខែឆ្នាំដដែល អង្គភាពយើងក៏បានសម្ភាសន៍បន្តរទៅលោកស្នងការខេត្តតាកែវចំពោះករណីខាងលើ លោកបានតបយ៉ាងខ្លីវិញថា លោកមិនបានដឹងទេចំពោះរឿងនេះបើមានដីការចាប់ខ្លួនមែន គឺមិនរំលងលោកឡើយ តែចំពោះករណីមួយនេះលោកពិតជាមិនបានដឹងពិតមែន។
មហាជនមានការងឿងឆ្ងល់យ៉ាងខ្លាំងថាហេតុអ្វីលោកអធិការស្រុកគីរីវង់ថាមានដីការចាប់ខ្លួន ចំណែកលោកស្នងការ លោកថាមិនដឹង?
លោកស្រី ង៉ោញ ណី ក្រោយឃើញមានភាពមិនប្រក្រតីរបស់លោក ហែសីហបូរ៉ានិងបក្ខពួកសម្រុកចូលផ្ទះលោកស្រី ដោយគ្មានការជូនដំណឹងនិងគ្មានការឣនុញ្ញតិដោយឣយុត្តិធម៌បែបនេះ លោកស្រីសម្រេចចិត្តដាក់ពាក្យបណ្ដឹងលោក ហែម សីហបូរ៉ា និងបក្ខពួកទៅតុលាការ ដោយទាមទារសំណងជម្ងឺចិត្ត១០មុឺនដុល្លារ និងសំណូមពរផ្តន្ទាទោសលោក ហែម សីហបូរ៉ា និងបក្ខពួកតាមច្បាប់ ។
ជាចុងក្រោយលោកស្រី ង៉ោញ ណី និងក្រុមគ្រួសារដែលជាជនរងគ្រោះសូមសំណូមពរដល់ស្ថាប័នតុលាការ និង ថ្នាក់ដឹកទាំងអស់ សូមជួយរកយុត្តិធម៌ដល់រូបលោកស្រីនិងក្រុមគ្រួសាររបស់គាត់ផង៕
