(ចេញផ្សាយនៅថ្ងៃទី០៦ ខែកក្កដា ឆ្នាំ២០២២)
ភ្នំពេញ៖ ប្រជាពលរដ្ឋក៏ជាមហាជនបានឆ្ងល់ថា ផ្សារទំនើបស៊ីធីម៉ល ក្នុងសង្កាត់វាលវង្ស ខណ្ឌ៧មករា រាជធានីភ្នំពេញ កំពុងតែបើកល្បែងស៊ីសងអោយភ្ញៀវក្មេង ចាស់ ប្រុស ស្រី ចូលលេងយ៉ាងពពាក់ពពូន ហេតុអ្វីបានលោក នេត ស៊ីថុន អធិការខណ្ឌ ៧មករា មើលមិនឃើញ។
សូមរំលឹកថា កន្លងមកសម្តេច ក្រឡាហោម ស ខេង បានបញ្ជាឲ្យអាជ្ញាធរ បង្ក្រាបឲ្យអស់គ្រប់ល្បែងស៊ីសងក្នុងមូលដ្ឋាន ដោយឡែកលោក នេត ស៊ីថុន អធិការខណ្ឌ ៧មករា មិនបង្រ្កាបល្បែងស៊ីសងនៅក្នុងផ្សារទំនើបស៊ីធីម៉ល ឬមួយលោកបានទទួលសំណែនសែនព្រេនពីម្ចាស់ទីតាំងខាងលើអស់ហើយឬយ៉ាងណា ?
បើយោងតាមការរៀបរាប់របស់អាជីវករដែលលក់ដូរក្នុងផ្សារទំនើប ស៊ីធីម៉លនិងភ្ញៀវដែរមកដើរទិញឥវ៉ាន់ក្នុងផ្សារខាងលើបានប្រាប់អ្នកសារព័ត៌មានយើងខ្ញុំអោយបានដឹងថា៖«សម្លេង»នៅក្នុងផ្សារសុីធីម៉ល នៅជាន់ខាងលើមានទីតាំងល្បែងភ្នាល់សុីសងគ្រប់ប្រភេទ មួយយ៉ាងធំបើកអោយភ្ញៀវ ក្មេង ចាស់ប្រុសស្រី ក្មេងមិនទាន់គ្រប់អាយុនឹងគ្រប់អាយុ ចូលលេងជារៀងរាល់ថ្ងៃ។
គាត់បានបន្ត៖ល្បែងអស់ទាំងនេះធ្វើអោយក្មេងគេចសាលាមិនចូលរៀន ក្មេងខ្លះអាចលួចលុយឪពុកម្តាយដើម្បីយកមកលេងល្បែងទាំងនេះ ហើយ«ល្បែងស៊ីសងគ្រប់ប្រភេទ ជាឬសគល់នៃបទល្មើសចោរកម្ម លួច ឆក់ ប្លន់ និង កេីត ករណីហិង្សា ក្នុងគ្រួសារ ជាដើម ជាហេតុ នាំឲ្យប្រជាពលរដ្ឋ មានការព្រួយបារម្មណ៍ ភ័យខ្លាច និងភាពអសន្តិសុខ នៅក្នុងសង្គមក៏ដូចក្នុងមូលដ្ឋានផងដែរ»។
ករណីទាក់ទងនឹងទីតាំងល្បែងខាងលើ ប្រជាពលរដ្ឋសូមសំណូមពរដល់លោក នេត ស៊ីថុន អធិការ ខណ្ឌ៧មករា លោកឧត្តមសេនីយ៍ឯក ស ថេត អគ្គស្នងការនគរបាលរាជធានីភ្នំពេញ ឯកឧត្ដម ឃួង ស្រេង អភិបាលរាជធានីភ្នំពេញ មេត្តាចាត់កម្លាំងជម្នាញចុះពិនិត្យមើលទីតាំងល្បែងខាងលើនេះផង ដើម្បីឲ្យស្របតាម គោលនយោបាយភូមិ ឃុំ សង្កាត់មានសុវត្ថិភាព ទាំង៧ចំណុច ៕
ជុំវិញការចុះផ្សាយខាងលើអង្គភាពសារព័ត៌មានយើងខ្ញុំ នឹងរងចាំការស្រាយបំភ្លឺ ពីសំណាក់សមត្ថកិច្ចពាក់ពន្ធ័ នឹងម្ចាស់ទីតាំងរៀងរាល់ម៉ោងធ្វើការ។ សូមអរគុណ!
