(ចេញផ្សាយនៅថ្ងៃទី០៨ ខែកក្កដា ឆ្នាំ២០២២)
ខេត្តក្រចេះ÷ មន្ត្រីអង្គការក្រៅរដ្ឋាភិបាលឃ្លាំមើលបទល្មើសព្រៃឈើនឹងប្រជាពលរដ្ឋដែរស្រឡាញ់ធនធានធម្មជាតិព្រៃឈើ ក្នុងខេត្តក្រចេះ បានសម្ដែងនៅការព្រួយបារម្ភយ៉ាងខ្លាំងចំពោះការបាត់បង់វិនាសហិនហោចធនធានធម្មជាតិព្រៃឈើ ដែរនៅសេសសល់តាមតំបន់នានាក្នុងខេត្ត ខណៈសកម្មភាពកាប់អាជ្រៀកឈើ ដឹកលក់យ៉ាងអាណាធិបតេយ្យ មានការក៏ក្រើកឡើងវិញ។
ជាក់ស្ដែងនៅពេលកន្លងទៅថ្មីៗនេះមានមេឈ្មួញឈ្មោះ វ៉ា រស់នៅភូមិស្រែ១០០ សង្កាត់អូរឫស្សី ក្រុងក្រចេះ និងដៃគូឈ្មោះ អៀក រស់នៅភូមិព្រែកចំឡាក់ ឃុំកញ្ជរ ស្រុកឆ្លូង នៅតែធ្វើសកម្មភាពដឹកជញ្ជូនឈើតាមរ៉ឺម៉កធំៗ និងតាមរថយន្តពីភូមិ105 ឃុំថ្មី ស្រុកចិត្របុរី ទៅលក់នៅឃុំកញ្ជរ ស្រុកឆ្លូង យ៉ាងពេញបន្ទុក។
ប្រភពបានឲ្យដឹងទៀតថា ឈ្មួញឈ្មោះ វ៉ា និងឈ្មោះ អៀច ដឹកជញ្ជូនឈើទៅលក់ឲ្យឈ្មួញឈ្មោះ សង់ នៅភូមិព្រែកចំឡាក់ ឃុំកញ្ជរ ស្រុកឆ្លូង យ៉ាងរលូន ព្រោះឈ្មួញឈ្មោះ សង់ មានមន្រ្តីធំនៅពីក្រោយខ្នង។
ប្រជាពលរដ្ធ រស់នៅភូមិ105 ឃុំថ្មី ស្រុកចិត្របុរី ខេត្តក្រចេះ បន្តលើកឡើងថា ដោយសារតែភាពធូររលុង នឹង មានការឃុបឃិតគ្នាប្រព្រឹត្តអំពើពុករលួយ ជាពិសេសទៀតនោះ គឺចូលរួមបើកដៃដើម្បីទទួលបានលាភសក្ការៈផ្ទាល់ខ្លួន ដែលកន្លងមកធ្វើអោយមេឈ្មួញដុះស្លែឈ្មោះ អៀក និងឈ្មោះ វ៉ា ទាំងពីរនាក់នេះមានខ្នងបង្អែកដ៏រឹងមាំ ក្នុងនោះក៏មានមន្ត្រីបរិស្ថាន បើកដៃអោយមានការកាប់បំផ្លាញព្រៃឈើ ក្នុងព្រៃការពាររបស់រដ្ឋនឹងបន្តធ្វើសកម្មភាពដឹកជញ្ជូនតាមរ៉ឺម៉កធំៗ និងតាមរថយន្តពីស្រុកចិត្របុរី ចូលទៅឃុំកញ្ជរ ស្រុកឆ្លូង យ៉ាងពេញបន្ទុក។
មន្រ្តីរដ្ឋបាលព្រៃឈើ មន្រ្តីបរិស្ថាន និងសមត្ថកិច្ចពាក់ព័ន្ធ ក្នុងស្រុកចិត្របុរី និងស្រុកឆ្លូង មិនមានវិធានការទប់ស្កាត់អ្វីសោះឬមួយបានទទួលសំណែនសែនព្រេនពីឈ្មួញឈ្មោះ វ៉ា និងឈ្មួញឈ្មោះ អៀច ហើយមើទៅ បានជាបណ្ដោយឲ្យឈ្មួញទាំងពីរនាក់នេះធ្វើអ្វីៗតាមអំពើចិត្ត។
ប្រជាពលរដ្ធ រស់នៅភូមិ105 ឃុំថ្មី ស្រុកចិត្របុរី ខេត្តក្រចេះ បានគោរពស្នើសុំលោក សាន្ត ប៊ុនថាន មេបញ្ជាការកងរាជអាវុធហត្ថខេត្តក្រចេះ និងលោក វ៉ា ថន អភិបាលនៃគណៈអភិបាលខេត្តក្រចេះ មិនគូរបណ្តែតបណ្ដោយឲ្យឈ្មួញឈើល្បីល្បាញ ឈ្មោះ វ៉ា នឹងឈ្មោះ អៀក ដឹកជញ្ជួនឈើទៅលក់ ដោយសេរី គ្មានការទប់ស្កាត់ ពីសំណាក់មេព្រៃ ក៏ដូចជាមន្ត្រីបរិស្ថាននឹងកម្លាំងជំនាញពាក់ព័ន្ធនោះទេ។
ជាពិសេសនោះជាសេចក្តីរាយការណ៌មួយជូនទៅក្រសួងបរិស្ថានដែលដឹកនាំដោយឯកឧត្តម សាយ សំអាល់ជាប្រធានតែងតែផ្ដាំផ្ញើឲ្យមន្ត្រីថ្នាក់ក្រោមគោរពតាមបទបញ្ជារបស់ថ្នាក់ដឹកនាំ បានឲ្យរក្សាការពារ សម្បត្តិធនធានធម្មជាតិ ឱ្យនៅគង់វង្ស ផងដែរ មិនមែនមកធ្វើការរបៀបអ៊ែលៗកន្ទេលធំបន្លំដេករបៀបនេះនោះទេ។
ការផ្សព្វផ្សាយខាងលើនេះនិងជ្រាបជាព័ត៌មានដល់ឯកឧត្តម ហើយអង្គភាពសារព័ត៌មានយើងសង្ឃឹមនឹងជឿជាក់ថា ឯកឧត្តមនិងចាត់កម្លាំងចុះមកបើកការស៊ើបអង្កេតនឹងចាត់វិធានការផ្លូវច្បាប់ទៅលើឈ្មួញឈើឈ្មោះ វ៉ា នឹង ឈ្មោះ អៀច នេះផងទាន បើពុំនោះទេពិតណាស់ព្រៃឈើដែលនៅសេសសល់នាដំណាក់ចុងក្រោយក្នុង ខេត្តរតនគិរីនេះ ត្រូវរលាយហិនហោចឆាប់ៗខាងមុខនេះជាពុំខាន!៕
