(ចេញផ្សាយនៅថ្ងៃទី២២ ខែកក្កដា ឆ្នាំ២០២២)
ឯកឧត្តមបានសូមពាំនាំនូវប្រសាសន៍ផ្តាំផ្ញើសាកសួរសុខទុក្ខពី សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធានកាកបាទក្រហមកម្ពុជា ដែល សម្តេច តែងតែគិតគូរពីសុខទុក្ខរបស់ប្រជាពលរដ្ឋជានិច្ច ទីណាមានការលំបាកទីនោះមានកាកបាទក្រហមកម្ពុជា ដែលតែងតែចុះជាប់ជាប្រចាំជាមួយប្រជាពលរដ្ឋ ដោយមិនប្រកាន់ព័ណ៌សម្បុរ ពូជសាសន៍ សាសនា និន្នាការនយោបាយអ្វីឡើយ ជាក់ស្តែងថ្ងៃនេះតាមរយៈសាខាកាកបាទក្រហមកម្ពុជា ខេត្តព្រះវិហារ បាននាំយកសម្ភារ និងថវិកា មកផ្តល់ជូនបងប្អូនទាំងអស់ ចំនួន១៤៩ គ្រួសារ នៅទីនេះ ដែលមានជីវភាពខ្វះខាត ក្រីក្រលំបាក ។
ឯកឧត្តមបន្តថា កាលណាសង្គមជាតិមួយ មានសន្តិភាពហើយ នោះបងប្អូន កូនក្មួយ មានឱកាសសិក្សារៀនសូត្រ ជំនាញវិជ្ជាជីវៈ និងប្រកបមុខរបរផ្សេងៗ តាមជំនាញ និងចំណូលចិត្តរៀងខ្លួន ហើយផលចំណូលដែលទទួលបាន នឹងបានមកដោយសន្សឹមៗ ពេលនោះ កូនចៅយើង នឹងមានលំនៅដ្ឋានសមរម្យ មធ្យោបាយធ្វើដំណើរ និងមានអនាគត រៀងៗខ្លួន។
ក្នុងឱកាសនោះឯកឧត្តមបានអំពាវនាវសូមលោកយាយ លោកតា បងប្អូនកូនក្មួយ ទាំងអស់ សូមបន្តនាំគ្នាទៅចាក់វ៉ាក់សាំង ដូសជំរុញ (ដូសទី៣ ទី៤ ទី៥) បន្តទៀត ចាប់ពីអាយុ ០៣ឆ្នាំ ឡើងទៅ ដើម្បីចូលរួមទប់ស្កាត់ការរាលដាលជំងឺកូវីដ១៩ ព្រោះថាជំងឺកូវីដ វាមិនទាន់ទៅណាឆ្ងាយពីយើងនៅឡើយទេ ហើយក្នុងរយៈពេលប៉ុន្មានថ្ងៃកន្លងមកនេះ ក៏មាន
អ្នកឆ្លងជាបន្តបន្ទាប់ផងដែរ។
-ចំពោះស្រ្តីមានផ្ទៃពោះក៏សូមទៅពិនិត្យផ្ទៃពោះ អោយបានទៀងទាត់តាមការកំណត់របស់ គ្រូពេទ្យដើម្បីតាមដានសុខភាពទាំងម្តាយ និងកូន ជៀសវាងគ្រោះថ្នាក់កើតឡើងជាយថាហេតុ។
-ត្រូវសម្រាកក្នុងមុងឱ្យបានជាប់ជាប្រចាំ ព្រោះរដូវភ្លៀងធ្លាក់មានមូសខ្លា អាចបណ្តាលឱ្យ កើតជំងឺគ្រុនឈាម។
-ត្រូវការពារកូនតូចៗ កុំឱ្យទៅលេងទឹក ការពារគ្រោះថ្នាក់ ព្រោះថាប៉ុន្មានថ្ងៃនេះ មានអ្នកគ្រោះថ្នាក់ដោយលង់ទឹកស្លាប់ជាបន្តបន្ទាប់។
-ពេលភ្លៀងត្រូវរកកន្លែងដែលមានសុវត្ថិភាព មិនត្រូវជ្រកក្រោមដើមឈើធំៗ ត្រូវបិទទូរស័ព្ទ ដើម្បីការពារគ្រោះថ្នាក់ដែលបណ្តាលមកពីរន្ទះ។
ជាចុងក្រោយឯកឧត្តមបានស្នើសុំ អាជ្ញាធរមូលដ្ឋាន សមត្ថកិច្ចពាក់ព័ន្ធ និងមន្ទីរសុខាភិបាល ត្រូវត្រៀមលក្ខណៈរួចជាស្រេច ដើម្បីជួយសង្គ្រោះប្រជាពលរដ្ឋគ្រប់ពេល និងត្រៀមទីទួលសុវត្ថិភាព និងថ្នាំសង្កូវផ្សេងៗ មានថ្នាំពិសពស់ ជាដើម…។ល។
សម្ភារផ្តល់ជូន លោកយាយ លោកតាបងប្អូនទាំង ១៤៩ គ្រួសារ ក្នុងមួយគ្រួសារៗរួមមាន៖ អង្ករ ២៥ គីឡូក្រាម, មី ០១ កេស, ត្រីខ ០១ យួរ, ទឹកស៊ីអ៊ីវ ០១យួរ, និងថវិកាចំនួន ២ ម៉ឺនរៀល។
