(ចេញផ្សាយនៅថ្ងៃទី០៧ ខែសីហា ឆ្នាំ២០២២)
អភិបាលខេត្តព្រះវិហារ÷ ឯកឧត្តម គីម រិទ្ធី និងលោកជំទាវ ព្រមទាំងមន្ដ្រីរាជការជុំវិញខេត្ត អញ្ជើញអុជអូបបួងសួងសុំសេចក្ដីសុខ នៅវត្តដំបូកខ្មៅ និងវត្តជុំវរាហង្សី (ហៅវត្តរអាងថ្មបីដុំ) ស្ថិតនៅ ស្រុកសង្គមថ្មី ខេត្តព្រះវិហារ ដែលពិធីនេះ មានការ អញ្ជើញ ចូលរួមពីសំណាក់ ឯកឧត្តម លោកជំទាវ អភិបាលរងខេត្ត មេបញ្ជាការកងកម្លាំងទាំងបី ថ្នាក់ដឹកនាំ មន្ទីរអង្គភាពនានាជុំវិញខេត្ត ព្រមទាំង មន្ដ្រីរាជការអាជ្ញាធរគ្រប់លំដាប់ថ្នាក់ នៅព្រឹកថ្ងៃទី ០៧ ខែសីហា ឆ្នាំ២០២២។
ពិធីអុជធូប និងសែនគ្រឿងសក្ការៈបូជាជាច្រើនមុខនាពេលនេះ ឯកឧត្តម និងលោកជំទាវ ព្រមទាំងមន្ត្រីរាជការក៏បានបួងសួង និងឧទ្ទិសដល់បារមីវត្តដំបូកខ្មៅ បារមីវត្តថ្មបីដុំ និងឧទ្ទិសដល់បារមី វត្ថុស័កសិទ្ធទាំងអស់ក្នុងលោក ប្រទានពរជ័យ សិរីមង្គល បវរមហាប្រសើរជូនដល់ថ្នាក់ដឹកនាំ មន្រ្តីរាជការ និងប្រជាពលរដ្ឋនៅទូទាំងខេត្តព្រះវិហារ ឲ្យជៀសផុត ពីរោគភ័យទាំងពួង ។ ព្រមទាំង ឧទ្ទិសកុសលផលបុណ្យទាំងឡាយ ជូនដល់បុព្វការីជន មានយុទ្ធជន យុទ្ធនារី ដែលបានបូជា ក្នុងបុព្វហេតុរំដោះ ជាតិមាតុភូមិឱ្យឆ្លងផុតពីភពខ្មៅងងិត និងសង្គ្រាមរ៉ាំរ៉ៃអស់ កាលជាយូរឆ្នាំ រហូតធ្វើឱ្យប្រទេសជាតិ មានសុខសន្ដិភាព និងការអភិវឌ្ឍន៍រីកចម្រើនលើគ្រប់វិស័យ រហូតមានអ្វីៗ គ្រប់យ៉ាងដូចសព្វថ្ងៃនេះ។
ក្នុងឱកាសអុជធូបបួងសួងសុំសេចក្ដីសុខនាពេលនោះ ឯកឧត្តម គីម រិទ្ធី និងលោកជំទាវក៏បាន ជួបសំណេះសំណាលជាមួយបងប្អូនប្រជាពលរដ្ឋ ដែលរស់នៅលើខ្នងភ្នំត្បែង៣៨គ្រួសារ។ ឯកឧត្តម បានមានប្រសាសន៍ថា ថ្ងៃនេះពិតជាមានសេចក្ដីសោមនស្សរីករាយយ៉ាងក្រៃលែង ដែលបានបាន ជួបបងប្អូន និងដឹងថាបងប្អូន មានជីវភាពធូធាពីការលក់ដូ ដឹកជញ្ជូនសម្ភារៈ និងដឹកភ្ញៀវទេសចរណ៍ ដែលមកកំសាន្តនៅលើខ្នងភ្នំត្បែង ។ ឯកឧត្តមបានបន្តទៀតថា លើខ្នងភ្នំត្បែងនេះមិនអាចធ្វើស្រែ បានទេ ប៉ុន្តែបងប្អូនចេះ រកឬសឈើ មើមដំឡូង និងទឹកឃ្មុំពីក្នុងព្រៃលក់ជូនភ្ញៀវទេសចរណ៍ ដែលមក កំសាន្តនៅទីនេះ ឯកឧត្តមក៏បានអំពាវនាវដល់បងប្អូនប្រជាពលរដ្ឋ និងភ្ញៀវទេសចរណ៍ទាំងអស់ កុំបោះសម្រាប់ចោលផ្ដេសផ្ដាស់ និងចូលរួមថែរក្សាបរិស្ថានទាំងអស់គ្នា ដើម្បីលើកស្ទួយវិស័យ ទេសចរណ៍ក្នុងខេត្តឲ្យកាន់តែរីកចម្រើនជាលំដាប់។
សូមបញ្ជាក់ផងដែរថា ការជួបសំណេះសំណាលជាមួយបងប្អូនប្រជាពលរដ្ឋ ៣៨គ្រួសារនាពេល នោះ ឯកឧត្តមនិងលោកជំទាវ ក៏បានឧបត្ថមក្នុង១គ្រួសារៗ ទទួលបានថវិកា១០ម៉ឺនរៀលផងដែរ។
