ទីតាំងបើកល្បែងស៊ីសងអនឡាញ ជល់មាន់ តាមកញ្ចក់ទូរទស្សន៍ កំពុងតែពេញនិយម នៅក្នុងភូមិត្រពាំងភូមិ ឃុំពើក ស្រុកអង្គស្នួល ប្រជាពលរដ្ឋសំណូមពរលោក មាន សំណាង អធិការស្រុកអង្គស្នួល ចាត់កម្លាំងចុះបង្ក្រាបផង(វគ្គ១)

(ចេញផ្សាយនៅថ្ងៃទី១៤ ខែសីហា ឆ្នាំ២០២២)

ខេត្តកណ្ដាល÷ បើតាមសេចក្តីរាយការណ៍ពីប្រជាពលរដ្ឋ នៅក្នុងភូមិត្រពាំងភូមិ ឃុំពើក ស្រុកអង្គស្នួល បានប្រាប់អង្គភាពសារព័ត៌មាន{ស៊ីអិនធី ហតញូយ៍}យើងអោយដឹងថា មានទីតាំងប្រមូលផ្តុំលេងល្បែងស៊ីសងអនឡាញ ជល់មាន់ តាមកញ្ចក់ទូរទស្សន៍ ដ៏ធំមួយកន្លែងកំពង់បើកទទួលស្វាគមន៍ក្រុមអ្នកញៀនល្បែងឲ្យចូលលេងយ៉ាងពពាក់ពពូនគ្មានឃើញសមត្ថកិច្ចណាបង្ក្រាប ដែលកំពុងធ្វើឱ្យប៉ះពាល់ដល់សុខទុក្ខបងប្អូនប្រជាពលរដ្ឋនៅក្នុងមូលដ្ឋាន នឹង ធ្វើឱ្យក្រុមគ្រួសារឈ្លោះទាស់ទែងគ្នាដោយសារតែប្ដីមិនទៅធ្វើការគិតតែលេងល្បែងស៊ីសង។

ក្រោយពីទទួលបានព័ត៌មានពីប្រជាពលរដ្ឋល្អថា មានល្បែងស៊ីសង អនឡាញ ជល់មាន់ តាមកញ្ចក់ទូរទស្សន៍ នៅព្រឹកថ្ងៃអាទិត្យទី១៤ ខែសីហា ឆ្នាំ២០២២នេះ អង្គភាពសារព័ត៌មានយើងបានចុះទៅដល់ទីតាំងដើម្បីផ្តិតរូបភាពជាក់ស្ដែងពិតជាមានការបើកលេងល្បែងពិតប្រាកដមែនដើម្បីធ្វើការចុះផ្សាយជូនដល់អាជ្ញាធរនៅក្នុងមូលដ្ឋានមានចំណាត់ការចុះបង្ក្រាបផង។

ទីតាំងខាងលើបើយើងធ្វើដំណើរមកពីភ្នំពេញតាមបណ្ដោយផ្លូវជាតិលេខ០៤ មកដល់ចំណុចក្រុមហ៊ុន ស៊ី.ភី.ខេមបូឌា ចំកាត់ បត់ស្ដាំចូលតាមផ្លូវបេតុងប្រហែល ២០០ ម៉ែត្រ ដល់ផ្លូវលំ និងធ្វើដំណើរទៅមុខប្រហែល ២០០ ម៉ែត្រ នឹង ឃើញទីតាំងខាងលើនេះកំពុងតែបើកទទួលក្រុមអ្នកញៀនល្បែងអោយចូលលេងយ៉ាងច្រើនកុះករពពាក់ពពួនគ្នាដូចដង្ហែកឋិន ដោយមិនខ្លាចញញ្ញើតអ្វីទាំងអស់ហាក់បីដូចប្រទេសគ្មានច្បាប់អញ្ចឹង។

តើឯណាទៅគោលយោបាយភូមិ/ឃុំ/សង្កាត់ មានសុវត្ថិភាពទាំង៧ ចំណុចរបស់រាជរដ្ឋាភិបាលដែលបានដាក់ចេញអោយក្រសួងមហាផ្ទៃអនុវនោះ ។

ព្រោះយើងដឹងហើយថា ទីណាមានល្បែងស៊ីសង ទីនោះនឹងមានបទល្មើសនានា កើតឡើងជាហូរហែ ធ្វើឲ្យភូមិ/ឃុំ/សង្កាត់ គ្មានសុវត្ថិភាពប្រជាពលរដ្ឋរស់នៅដោយក្ដីព្រួយបារម្ភ ដែលផ្ដើមចេញពីល្បែងស៊ីសង មួយកន្លែងនេះ ដែលកំពុងតែរួមចំណែកបង្កើតបទល្មើសនានា ឲ្យកើតមានឡើងនៅក្នុង ភូមិ/ឃុំ/ពួកគាត់ដូចជាចោរលួច ចោរឆក់ ចោរប្លន់ និង អំពើហិង្សាក្នុងគ្រួសារជាដើម។ល។ ដោយអាជ្ញាធរមានសមត្ថកិច្ច មិនមានចំណាត់ការបង្ក្រាប ដូចជាមិនទទួល ដឹង លឺ នៅល្បែងស៊ីសង មួយកន្លែងនេះ ដែលស្ថិតនៅភូមិត្រពាំងភូមិ ឃុំពើក ស្រុកអង្គស្នួល ខេត្តកណ្ដាល។

ប្រជាពលរដ្ឋដាក់ការសង្ស័យថា ប្រហែលអាជ្ញាធរមានសមត្ថកិច្ចពាក់ព័ន្ធត្រូវរ៉ូវគ្នាជាមួយម្ចាស់ទីតាំងអស់ហើយទេដឹង.? ទើបទីតាំងខាងលើនេះបើកលេងយ៉ាងគគ្រឹកគគ្រេងបែបនេះ។

ករណីខាងលើនេះសូមលោករសេនីយ៍ឯក មាន សំណាង អធិការស្រុកអង្គស្នួល មានចំណាត់ការផង(ចៀសវាងគេងមិនលក់ធ្វើជាសម្រាន្តលក់) និងជួយមើលមន្ត្រីក្រោមឱវាទដែលរក្សាការពារនៅក្នុងទឹកដី ភូមិ/ឃុំ ខាងលើនេះផង តើរាល់ថ្ងៃនេះគាត់រវល់ធ្វើអ្វីដែរ? បានជាបណ្ដែតបណ្ដោយ អោយមានល្បែងស៊ីសង បង្កើតឡើងនៅក្នុងមូលដ្ឋានរបស់ខ្លួន ដោយសេរីបែបនេះ?

ប្រជាពលរដ្ឋកន្ទឹងរង់ចាំមើលថា តើចំណាត់ការអាជ្ញាធរពាក់ព័ន្ធពិសេសលោកវីរៈសេនីយ៍ឯក មាន សំណាង អធិការស្រុកអង្គស្នួល តើលោកហ៊ាន រឺ មិនហ៊ាន? នៅការបង្ក្រាបទីតាំងល្បែងអនឡាញ ជល់មាន់តាមកញ្ចក់ទូរទស្សន៍ ដ៏ធំមួយកន្លែងនេះ។