(ចេញផ្សាយនៅថ្ងៃ១៧ ខែសីហា ឆ្នាំ២០២២)
កំពង់ឆ្នាំង៖នៅថ្ងៃទី១៧ ខែសីហា ឆ្នាំ២០២២ ឯកឧត្តមស៊ុន សុវណ្ណារិទ្ធិ អភិបាលខេត្តកំពង់ឆ្នាំង រួមជាមួយលោកជំទាវ កែ ច័ន្ទមុនី អ្នកតំណាងរាស្ត្រមណ្ឌលកំពង់ឆ្នាំង ឯកឧត្ដម លោកជំទាវសមាជិកក្រុមប្រឹក្សាខេត្ត អភិបាលរងខេត្ត បានអមដំណើរឯកឧត្ដមបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ ប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ឆ្នាំង អញ្ជើញជាអធិបតីបើកការដ្ឋានសាងសង់ផ្លូវក្រាលកៅស៊ូពីរជាន់ប្រភេទ (DBST) ១ខ្សែ ប្រវែងជាង៥ គីឡូម៉ែត្រ ក្នុងក្របខណ្ឌគម្រោងពង្រឹងសមត្ថភាពផលិតភាពជនបទ ហៅកាត់ថា (NRRPCP) ដែលមានក្រសួងអភិវឌ្ឍន៍ជនបទ ជាស្ថាប័នប្រតិបត្តិ។
ក្នុងពិធីបើកការដ្ឋាននោះ ក៏មានការអញ្ជើញចូលរួមពីឯកឧត្ដម លោកជំទាវថ្នាក់ដឹកនាំក្រសួងអភិវឌ្ឍន៍ជនបទ ថ្នាក់ដឹកនាំក្រុង ស្រុក មន្ទីរ អង្គភាពជុំវិញខេត្ត មន្ត្រីរាជការ កងកម្លាំង លោកគ្រូ អ្នកគ្រូ សិស្សានុសិស្ស និងប្រជាពលរដ្ឋយ៉ាងច្រើនកុះករ។
មានមតិសំណេះសំណាលក្នុងឱកាសនោះដែរ ឯកឧត្តមបណ្ឌិតសភាចារ្យរដ្ឋមន្រ្ដីបានថ្លែងថា ផ្លូវដែលកំពុងបើកឲ្យដំណើរការសាងសង់នាពេលនេះមានប្រវែង ៥ គីឡូម៉ែត្រ ៧៤៤ ម៉ែត្រ ក្នុងនោះប្រវែង ៣ គីឡូម៉ែត្រ ៣៨០ ម៉ែត្រ ជាផ្លូវក្រាលកៅស៊ូពីជាន់ប្រភេទ DBST និងប្រវែង ២ គីឡូម៉ែត្រ ៣៦៤ ម៉ែត្រ ជាផ្លូវបេតុង ដែលមានទទឹងប្រវែង ៨ ម៉ែត្រ និងសំណង់សិល្បការ្យ រួមមានលូប្រអប់ចំនួន ៣កន្លែង លូមូលកាត់ទទឹងផ្លូវចំនួន ៨ កន្លែង លូមូលកាត់ផ្លូវបំបែកចំនួន ១៩ កន្លែង លូអក្សរអ៊ុយរំដោះទឹកប្រវែង ១ ៣៦៩ ម៉ែត្រ។ ជាមួយនេះមានបំពាក់ស្លាកសញ្ញាសុវត្ថិភាពតាមបណ្ដោយខ្សែផ្លូវ រួមមានស្លាកសញ្ញាចរាចរណ៍ ៦៩ កន្លែង គំនូសអក្សរផ្លូវ និងមានគំនូសសម្រាប់ថ្មើរជើងឆ្លងកាត់ចំនួន ៤ កន្លែងផងដែរ។ ផ្លូវនេះតភ្ជាប់ពីផ្លូវជាតិលេខ ៥ ចាប់ពីភូមិក្បាលថ្នល់ ភូមិតាសូរ ភូមិតាសុខ ភូមិចំបក់ផ្អែម ដល់ភូមិកំពង់ប្រាសាទ ឃុំសែប ស្រុកកំពង់ត្រឡាច ខេត្តកំពង់ឆ្នាំង ដែលគ្រោងនឹងបញ្ចប់ការសាងសង់នៅអំឡុងខែមិថុនា ឆ្នាំ២០២៣ ខាងមុខ ដោយទទួលសាងសង់ដោយ ក្រុមហ៊ុន UNG SIMSIA CONSTRUCTION CO.LTD ក្នុងទឹកប្រាក់ប្រមាណជា ១ ៧២២ ២២៩,៣៦ដុល្លារអាមេរិក។
ឯកឧត្តមបណ្ឌិតបានបន្តថា នេះជាគម្រោងថ្មីមួយរបស់រាជរដ្ឋាភិបាល ដែលមានសម្ដេចតេជោជាប្រមុខដឹកនាំ ផ្ដល់ឱកាសមានលក្ខណៈពិសេសខុសពីគម្រោងផ្សេងៗទៀត ដែលមានលក្ខខណ្ឌតម្រូវឲ្យចាប់ផ្ដើមអនុវត្តបន្ទាន់ ដើម្បីបន្តរក្សានិរន្ដរភាពសេដ្ឋកិច្ចជនបទ ស្ដារជីវភាពរបស់ប្រជាជននៅជនបទ ឲ្យល្អប្រសើរឡើងវិញ បន្ទាប់ពីបាននឹងកំពុងងើបពីវិបត្តិជំងឺកូវីដ-១៩។
