ក្នុងឱកាសជួបសំណេះសំណាលនោះ ក៏មានវត្តមាន អតីតកីឡាករ នៃក្លឹបអធិរាជភ្នំស្វាយ របស់ឯកឧត្តម រ័ត្ន ស៊្រាង កាលពីជាង9ឆ្នាំមុន មកចូលរួមផងដែរ ដែលកាលនោះគឺឯកឧត្តម រ័ត្ន ស៊្រាង នៅជាមេបញ្ជាការ កងរាជអាវុធហត្ថ ខេត្តបន្ទាយមានជ័យ លោកបានគាំទ្រនិងលើកស្ទួយវិស័យកីឡាបាល់ទាត់ ក្នុងខេត្តបន្ទាយមានជ័យយ៉ាងផុលផុស តាមរយៈការបង្កើតក្លឹបកីឡាបាល់ទាត់ស្ត្រី បាល់ទាត់យុវជន បាល់ទាត់កុមារក្រោម១៣ឆ្នាំ បានផ្តួចផ្តើមឲ្យមានការបណ្តុះបណ្តាល អាជ្ញាកណ្តាល, គ្រូបង្វឹកបាល់ទាត់ទាំងតារាងធំនិងហ្វុតសាល ជាច្រើនវគ្គទូទាំងខេត្ត ដោយមានការសហការណ៍ជាមួយសហព័ន្ធបាល់ទាត់កម្ពុជា និងបានបង្កើតពានរង្វាន់ប្រកួតប្រជែងតាមបណ្តាស្រុក ទូទាំងខេត្តបន្ទាយមានជ័យ ជាប្រចាំផងដែរ។

លោកឧត្តមសេនីយ៍ឯក រ័ត្ន ស្រ៊ាង បានថ្លែងថា លោកពិតជាមានការរំភើបខ្លាំងណាស់ រយៈពេល៩ឆ្នាំដែលលោកបានផ្លាស់ពីមេបញ្ជាការកងរាជអាវុធហត្ថខេត្តបន្ទាយមានជ័យ មកកាន់តំណែងជាមេបញ្ជាការ កងរាជអាវុធហត្ថរាជធានីភ្នំពេញ ស្រាប់តែអតីតក្រុមកីឡាករបាល់ទាត់U13 នៃក្លឹបអធិរាជភ្នំស្វាយរបស់លោក ជាច្រើននាក់ បានក្លាយជាកីឡាករជម្រើសជាតិនិងជាកីឡាករឆ្នើមនៃក្លឹបថ្នាក់ជាតិល្បីៗជាច្រើនផងដែរ ជាក់ស្តែងដូចជា៖
១/ កីឡាករ ឱ ភារុន បច្ចុប្បន្នលេងឲ្យ ក្លឹបបាល់ទាត់បឹងកេត (ជាប់ជម្រើសជាតិ ឈុតធំ)
២/ កីឡាករ ផាន សុផេន បច្ចុប្បន្នលេងឲ្យ ក្លឹបបាល់ទាត់ខេត្តព្រៃវែង (ជាប់ជម្រើសជាតិ ឈុតធំ)
៣/ កីឡាករ សឿត ណាវ៉ា បច្ចុប្បន្នលេងឲ្យ ក្លឹបបាល់ទាត់បឹងកេត (ជាប់ជម្រើសជាតិ U23)
៤/ កីឡាករ ដោ រ៉ូហ្សាន់ បច្ចុប្បន្នលេងឲ្យ ក្លឹបបាល់ទាត់ អាយអេស អាយ ដង្កោសែនជ័យ (ជាប់ជម្រើសជាតិ U23)
៥/ កីឡាករ ជូ សិនទិ បច្ចុប្បន្នលេងឲ្យ ក្លឹបបាល់ទាត់ព្រះខ័នរាជស្វាយរៀង (ជាប់ជម្រើសជាតិ U20)
៦/ កីឡាករ សុវណ្ណ ដូណា បច្ចុប្បន្នលេងឲ្យ ក្លឹបបាល់ទាត់ អង្គរថាយហ្គឺ (ជាប់ជម្រើសជាតិ U20)
៧/ កីឡាករ ឃុន សេងថៃ បច្ចុប្បន្នលេងឲ្យ ក្លឹបបាល់ទាត់អគ្គីសនីកម្ពុជា
៨/ កីឡាករ ពៅ ចាន់ថេត បច្ចុប្បន្នលេងឲ្យ ក្លឹបបាល់ទាត់ខេត្តព្រៃវែង
៩/ កីឡាករ សាវ៉ែង សំណាង បច្ចុប្បន្នលេងឲ្យ ក្លឹបបាល់ទាត់ភ្នំពេញក្រោន
១០/ កីឡាករ ជួង មករា បច្ចុប្បន្នលេងឲ្យ ក្លឹបបាល់ទាត់គីរីវង្សសុខសែនជ័យ
១១/ កីឡាករ ចាន់ ហួង បច្ចុប្បន្នលេងឲ្យ ក្លឹបបាល់ទាត់ អាយអេស អាយ ដង្កោសែនជ័យ
១២/ កីឡាករ រី លាភផេង បច្ចុប្បន្នលេងឲ្យ ក្លឹបបាល់ទាត់ព្រះខ័នរាជស្វាយរៀង
១៣/ កីឡាករ ស្រួច ជីវន្ត បច្ចុប្បន្នលេងឲ្យ ក្លឹបបាល់ទាត់អគ្គីសនីកម្ពុជា និង
១៤/ អតីតគ្រូបង្វឹកក្នុងក្លឹបអធិរាជភ្នំស្វាយ លោក សាប៊ូន វិនតា បច្ចុប្បន្នក្លាយជា នាយកអភិវឌ្ឍន៍យុវជន ក្លឹបបាល់ទាត់បឹងកេត។

និយាយដល់គ្រាកាលនៅជា មេបញ្ជាការ កងរាជអាវុធហត្ថខេត្តបន្ទាយមានជ័យ លោកឧត្តមសេនីយ៍ឯក រ័ត្ន ស៊្រាង ក៏ប្រែទឹកមុខក្តុកក្តួលអួលដើមក ដោយមនោសញ្ចេតនានឹករលឹក បងប្អូនប្រជាពលរដ្ឋអ្នកបន្ទាយមានជ័យ មន្ត្រីរាជការ កងកម្លាំងប្រដាប់អាវុធគ្រប់ប្រភេទ ដែលធ្លាប់ប្រាស្រ័យទាក់ទងទំនាក់ទំនងការងារជាមួយគ្នាកាលពី៩ឆ្នាំមុន ជាពិសេសបានបន្សល់ទុកនូវអនុស្សាវរីយ៍ល្អៗជាមួយគ្នាដែលមិនអាចបំភ្លេចបាន។

លោកឧត្តមសេនីយ៍ឯក រ័ត្ន ស្រ៊ាង ក៏បានថ្លែងនូវការកោតសរសើរ ចំពោះក្រុមកីឡាករ សាលាតម្រង់ទិស អាយុក្រោម១៨ឆ្នាំ (U18) ខេត្តបន្ទាយមានជ័យ ទាំងអស់ ដែលបានខិតខំប្រឹងប្រែង អស់ពីកម្លាំងកាយចិត្ត ក្នុងការប្រកួតនាពេលកន្លងមក រហូតឈានមកដល់វគ្គប្រកួត៤ក្រុមចុងក្រោយនាពេលនេះ ហើយលោកក៏បានផ្ដាំផ្ញើដល់ក្មួយៗទាំងអស់ ក្រៅពីយកពេលវេលាលេងកីឡា ក៏ត្រូវខិតខំរៀនសូត្របន្ថែមផងដែរ កុំយកពេលវេលាទៅប្រើប្រាស់មិនបានត្រឹមត្រូវ ឬប្រព្រឹត្តនូវអំពើអបាយមុខផ្សេងៗ ដែលបង្កឲ្យមានផលប៉ះពាលដល់ខ្លួនឯង គ្រួសារ និងសង្គមជាតិទាំងមូល។

បន្ទាប់ពីសំណេះសំណាលរួចរាល់ លោកឧត្តមសេនីយ៍ឯក រ័ត្ន ស្រ៊ាង បានឧបត្ថម្ភថវិកា ១០លានរៀល ចែកជូនដល់ក្រុមកីឡាករ សាលាតម្រង់ទិស អាយុក្រោម១៨ឆ្នាំ (U18) ខេត្តបន្ទាយមានជ័យទាំងអស់ គ្រូបង្វឹកនិងជំនួយការ ដែលដឹកនាំក្រុមកីឡាករមកពីខេត្តបន្ទាយមានជ័យ អតីតកីឡាករនិងគ្រូបង្វឹក នៃក្លឹបអធិរាជភ្នំស្វាយ គ្រប់គ្នាដែលមានវត្តមានក្នុងឱកាសនោះ និងបាននាំប្អូនៗក្រុមកីឡាករ គ្រូបង្វឹក ជំនួយការទាំងអស់ ទៅបរិភោគអាហារប៊ូសហ្វេ រួមគ្នា ប្រកបដោយភាពស្និទ្ធស្នាលសប្បាយរីករាយក្រៃលែង៕