កិច្ចប្រជុំលើកទី៥ គណៈកម្មាធិការសម្របសម្រួលថ្នាក់ជាតិប្រឆាំងការសម្អាតប្រាក់ និងហិរញ្ញប្បទានភេវរកម្ម និងហិរញ្ញប្បទានដល់ការរីកសាយភាយអាវុធមហាប្រល័យ (គ.ស.ហ) នៅព្រឹកថ្ងៃទី១៧ ខែវិច្ឆិកា នេះ នៅទីស្តីការក្រសួងមហាផ្ទៃ
អញ្ជើញជាអធិបតីដ៏ខ្ពង់ខ្ពស់ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានគណៈកម្មាធិការសម្របសម្រួលថ្នាក់ជាតិប្រឆាំងការសម្អាតប្រាក់ និងហិរញ្ញប្បទានភេវរកម្ម និងហិរញ្ញប្បទានដល់ការរីក សាយភាយអាវុធមហាប្រល័យ ហៅកាថា (គ.ស.ហ) បានរំពឹងថា ក្រុមការងារសកម្មភាពហិរញ្ញវត្ថុ (FATF) នឹងដកកម្ពុជាចេញពីបញ្ជីប្រផេះ បន្ទាប់ពីអង្គការនេះ បាន ចុះមកត្រួតពិនិត្យដោយផ្ទាល់នៅកម្ពុជា នាខែមករា ឆ្នាំ២០២៣ ។
សម្ដេចក្រឡាហោម ស ខេង បានបញ្ជាក់ថា «ការសម្រេចរបស់FATFឱ្យមានការចុះពិនិត្យផ្ទាល់ខាងមុខនេះ ជាឱកាសមាសដ៏កម្រសម្រាប់កម្ពុជា ដើម្បីឈានទៅដកខ្លួនចេញពីបញ្ជីប្រផេះ ដែលជាគោលដៅចុងក្រោយ នៃបេសកកម្មរបស់ ភាគីទាំងអស់» ។
