កំពង់ស្ពឺ: មានការភ្ញាក់ផ្អើលមួយបានកើតឡើងនៅតាមបណ្ដាញសង្គម ខណៈគ្រូពេទ្យនៅមន្ទីរសម្រាកព្យាបាលឯកជន(សម្ភពដើមអង្ក្រង) ដែលមានទីតាំងនៅផ្ទះគ្មានលេខ ផ្លូវជាតិលេខ ៣ ឃុំអង្គពពេល ស្រុកគងពិសី ខេត្តកំពង់ស្ពឺ បានព្យាបាល នឹងបានវះកាត់ស្ត្រីមានផ្ទៃពោះ៥ខែម្នាក់ដែលកូនស្លាប់ក្នុងស្បូនខុសបច្ចេកទេសពេទ្យ។ វះកាត់ពោះវៀនច្រឡំថាទងសុក បណ្ដាលឱ្យស្ត្រីខាងលើស្ទើរតែបាត់បង់អាយុជីវិត ខណៈនេះជនរងគ្រោះកំពុងសង្គ្រោះបន្ទាន់នៅឯមន្ទីរពេទ្យកាលម៉ែត្រ។
បច្ចុប្បន្នមន្ទីរសម្រាកព្យាបាលនិង(សម្ភពដើមអង្ក្រង) ត្រូវបានបិទបណ្ដោះជាអាសន្ន នេះយោងសេចក្តីសម្រេចរបស់ក្រសួងសុខាភិបាល.លេខ ១៨៧ អ.ប.ស.ម.ព ចុះថ្ងៃទី២៩ ខែវិច្ឆិកា ឆ្នាំ២០២២ ដែរបណ្ដាញសារព័ត៌មានយើងទទួលបាននៅល្ងាចថ្ងៃទី២៩ ខែវិច្ឆិកា ឆ្នាំ២០២២នេះ។
សម្រេច ប្រការ១. បិទបណ្ដោះអាសន្នមន្ទីរសម្រាកព្យាបាលឯកជនឈ្មោះ(ដើមអង្ក្រង) ដែលមានទីតាំងផ្ទះគ្មានលេខ ផ្លូវជាតិលេខ៣ ឃុំពពេល ស្រុកគងពិសី ខេត្តកំពង់ស្ពឺ របស់លោកស្រីវេជ្ជបណ្ឌិត សួស ច័ន្ទរស្មី ជាអ្នកទទួលខុសត្រូវដើម្បីសិក្សាស្រាវជ្រាវឲ្យបានច្បាស់លាស់ពីហេតុការណ៍ដែលបណ្ដាលមកពីករណីរំលូតកូនស្លាប់ក្នុងផ្ទៃតាមច្បាប់ជាធរមាន។
ប្រការ២ ត្រូវទុកជាមោឃៈនៅសេចក្តីសម្រេចលេខ ១៤៨/២០ អ.ប.ស.ម.ព ចុះថ្ងៃទី២២ ខែកក្កដាឆ្នាំ២០២២ របស់ក្រសួងសុខាភិបាល។
ប្រកា៣. អគ្គនាយកបច្ចេកទេសសុខាភិបាល ប្រធាននាយកដ្ឋានមន្ទីរពេទ្យ ប្រធានមន្ទីរសុខាភិបាលនៃរដ្ឋបាលខេត្តកំពង់ស្ពឺ និងលោកស្រីវេជ្ជបណ្ឌិត សួស ច័ន្ទរស្មី មានភារកិច្ចអនុវត្តសេចក្តីសម្រេចនេះតាមភារកិច្ចរៀងៗខ្លួនឲ្យមានប្រសិទ្ធភាពចាប់ពីថ្ងៃចុះហត្ថលេខាតទៅ។
ករណីខាងលើនេះធ្វើឱ្យមានការរិះគន់យ៉ាងខ្លាំងពីសំណាក់មហាជន ជាពិសេសអ្នកប្រើប្រាស់បណ្ដាញសង្គម និងបានរិះគន់យ៉ាងខ្លាំងចំពោះគ្រូពេទ្យនៅមន្ទីរសម្រាកព្យាបាល នឹង (សម្ភពដើមអង្ក្រង) ដែលបានធ្វេសប្រហែងបង្កឱ្យស្រ្តីមានពោះផ្ទៃស្ថិតនៅក្នុងស្ថានភាពធ្ងន់ធ្ងរបែបនេះ។
ករណីខាងលើនេះក្រុមមន្រ្តីជំនាញរបស់ក្រសួងសុខាភិបាល រួមទាំងមន្ទីរសុខាភិបាលខេត្តកំពង់ស្ពឺ បានចុះទៅដល់ទីតាំង ដើម្បីសួរនាំ ត្រួតពិនិត្យ និងអនុវត្តតាមវិធានការសុខាភិបាល៕
