ភ្នំពេញ ថ្ងៃទី២៦ ខែមករា ឆ្នាំ២០២៣ដោយមានអ្នកលើកឡើងថា កម្ពុជាបានផ្ដល់ជំនួយយោធាដល់អ៊ុយក្រែននោះ ប្រមុខរាជរដ្ឋាភិបាលកម្ពុជាសម្ដេចអគ្គមហាសេនាបតីតេជោ ហ៊ុន សែន បានបញ្ជាក់សារជាថ្មីថា កម្ពុជាគ្មានសមត្ថភាពដើម្បីផ្ដល់ជំនួយយោធាទៅឱ្យអ៊ុយក្រែននោះទេ ឯរឿងកម្ពុជាជួយបណ្ដុះបណ្ដាលអ្នកដោះមីនអ៊ុយក្រែន គឺជាកិច្ចការមនុស្សធម៌សុទ្ធសាធ។
ថ្លែងក្នុងពិធីប្រគល់សញ្ញាបត្រជូននិស្សិតសាកលវិទ្យាល័យវេស្ទើន ប្រមាណជាង ៣ ០០០ អង្គ/នាក់ នៅមជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វារ នាព្រឹកថ្ងៃទី២៦ ខែមករា ឆ្នាំ២០២៣ សម្ដេចតេជោ ហ៊ុន សែន មានប្រសាសន៍ថា កម្ពុជាមិនបានផ្ដល់ជំនួយយោធាទៅឱ្យអ៊ុយក្រែន ហើយកម្ពុជាគ្មានសមត្ថភាពដើម្បីផ្ដល់ជំនួយយោធាទៅឱ្យអ៊ុយក្រែននោះដែរ។ ឯរឿងកម្ពុជាជួយបណ្ដុះបណ្ដាលអ្នកដោះមីនអ៊ុយក្រែន គឺជាកិច្ចការមនុស្សធម៌សុទ្ធសាធ ហើយសូមកុំភ័ន្តច្រឡំ។ សម្ដេចតេជោបន្តថា កម្ពុជាបានបញ្ជូនកងទ័ពទៅធ្វើការដោះមីននៅក្រៅប្រទេស រួមចំណែកការពារសន្តិភាព ក្រោមឆ័ត្រអង្គការសហប្រជាជាតិ។ សម្ដេចតេជោលើកឡើងថា ឥឡូវកម្ពុជាមានកងទ័ពឈរជើងនៅ៤ប្រទេស ដូចជា នៅម៉ាលី ស៊ូដង់ខាងត្បូង លីបង់ និង អាហ្វ្រិកកណ្ដាល។ ប៉ុន្តែកាលពីពេលមុនយើងមានតាំងពីនៅ ស៊ីរី ឆាត និងសាយប្រ៊ឹស។
សម្ដេចតេជោគូសបញ្ជាក់ថា យើងបានជួយបណ្ដុះបណ្ដាលអ្នកដោះមីន ដែលមកតាំងពីប្រទេសកូឡំប៊ី និងប្រទេសមួយចំនួនផ្សេងទៀត មករៀនដោះមីននៅកម្ពុជា ដោយ កម្ពុជាមានមជ្ឈមណ្ឌលមីនអាស៊ាន ដែលមានទីតាំងនៅកម្ពុជា។ សម្ដេចតេជោបានបញ្ជាក់ទៀតថា ប្រទេសណាក៏ដោយដែលចង់មករៀនដោះមីននៅកម្ពុជា សូមអញ្ជើញ រាប់ទាំងប្រទេសរុស្ស៊ី យើងជួបណ្ដុះបណ្ដាលឱ្យទាំងអស់។សម្ដេចតេជោនាយករដ្ឋមន្ត្រីគូសបញ្ជាក់បន្ថែមថា កម្ពុជាមិនបានបញ្ជូនកងទ័ពចូលទៅក្នុងប្រទេសអ៊ុយក្រែន ហើយក៏មិនបានបញ្ជូនអ្នកដោះមីនចូលទៅក្នុងប្រទេសអ៊ុយក្រែនដែរ។ ដូច្នេះអ្វីដែលកម្ពុជាធ្វើនេះ គឺជាកិច្ចការមនុស្សធម៌សុទ្ធសាធ។
ជាមួយគ្នានេះដែរ សម្ដេចតេជោនាយករដ្ឋមន្រ្ដីបានសង្កត់ធ្ងន់ថា ការបំផ្លាញចោលគ្រាប់មីន និងគ្រាប់មិនទាន់ផ្ទុះគឺជាកិច្ចការដែលត្រូវធ្វើនៅគ្រប់ទីកន្លែងទាំងអស់នៅលើពិភពលោកនេះ។ សម្ដេចតេជោបានឱ្យដឹងថា កម្ពុជាបានប្រើពេល៣០ឆ្នាំហើយ ដើម្បីបំផ្លាញចោលគ្រាប់មីន និងគ្រាប់មិនទាន់ផ្ទុះនៅកម្ពុជាមិនទាន់អស់ទេ ដែលឥឡូវកម្ពុជាត្រូវវិនិយោគដោយគំហុកលើបញ្ហាមីននេះ ដើម្បីឈានទៅកម្ពុជាគ្មានមីននៅឆ្នាំ២០២៥។ សម្ដេចតេជោបានអះអាងថា ក្នុងឋានៈជាអ្នកសម្រេចចិត្តខាងនយោបាយ ដែលទទួលខុសត្រូលើនយោបាយក្នុងប្រទេស និងក្រៅប្រទេស កម្ពុជានិងទទួលប្រទេសណាក៏ដោយ ដែលចង់រៀនដោះមីន សូមមករៀននៅកម្ពុជា ហើយកម្ពុជាទទួល។ ដូច្នេះសូមកុំឱ្យកម្ពុជាចូលពាក់ព័ន្ធជាមួយនិងសកម្មភាពយោធានៅអ៊ុយក្រែន កម្ពុជាគ្មានសមត្ថភាពធ្វើបែបនោះទេ ប៉ុន្តែទាក់ទងនឹងកិច្ចការមនុស្សធម៌ ពាក់ព័ន្ធនឹងការកម្ចាត់ចោលគ្រាប់មីន និងគ្រាប់មិនទាន់ផ្ទុះ កម្ពុជាមានបទពិសោធន៍ជូរចត់លើបញ្ហានេះ។
ដូច្នេះកម្ពុជាមិនអាចបើកភ្នែកមើលនៅសោកនាដកម្មដោយសារគ្រាប់មីននៅតាមបណ្ដាប្រទេសនានាទេ។ នេះជារឿងដែលសម្ដេចតេជោបានបញ្ជាក់ អំពីក្របខណ្ឌគោលនយោបាយក្រៅប្រទេសរបស់កម្ពុជា ទាក់ទងនឹងបញ្ហារុស្ស៊ី និងអ៊ុយក្រែន៕
