បន្ទាយមានជ័យ៖ ប្ដីប្រពន្ធ២នាក់ត្រូវបានរថយន្តកិនស្លាប់ ចំនែកឯកូនប្រុសម្នាក់ទៀតបានរងរបួសធ្ងន់ ក្នុងករណីគ្រោះថ្នាក់ចរាចរណ៍ម៉ូតូបុកគោ ហើយខ្ទាតចូលក្រោមរថយន្ត កាលពីរសៀលថ្ងៃទី៥ ខែមីនា ឆ្នាំ២០២៣ នៅតាមបណ្តោយផ្លូវជាតិលេខ៦ ក្នុងឃុំឈ្នួរមានជ័យ ស្រុកព្រះនេត្រព្រះ។
ជនរងគ្រោះដែលស្លាប់ទី១.ឈ្មោះ សុខ ណាង ភេទប្រុស អាយុ៣៥ឆ្នាំ ត្រូវជាប្តី និងទី២.ឈ្មោះ វី ឈៀប អាយុ៣៧ឆ្នាំ ត្រូវជាប្រពន្ធ និងកូនប្រុសឈ្មោះ សុខ សីហា អាយុ៧ឆ្នាំ បានរងរបួសធ្ងន់ អ្នកទាំង៣នាក់ រស់នៅភូមិសួនអំពៅ ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
សមត្ថកិច្ចបានឲ្យដឹងថា មុនពេលកើតហេតុគ្រួសារជនរងគ្រោះបានជិះម៉ូតូហុងដាទ្រីម ពាក់ផ្លាកលេខបាត់ដំបង AO.6766 បានឌុបប្រពន្ធ និងកូនប្រុសម្នាក់ត្រឡប់ពីវាស់ដីនៅខេត្តព្រះវិហារ គោលបំណងត្រឡប់ទៅស្រុកវិញ ស្រាប់តែមកដល់កន្លែងកើតហេតុមានគោរត់ឆ្លងថ្នល់ ទើបម៉តូបុកគោដួលលើផ្លូវជាតិ។ ស្របពេលនោះរថយន្តធុនធំហ៊ីយិនដាយពាក់ផ្លាកលេខភ្នំពេញ 3C.1460 និងរ៉ឺម៉កក្រោយផ្លាកលេខព្រៈសីហនុ 4A.3008 ជិះមកដល់ក៏បានកិនស្លាប់ ២នាក់ និងរបួសកូនប្រុសធ្ងន់ម្នាក់តែម្ដង។
ក្រោយសមត្ថកិច្ចចុះមកដល់កន្លែងកើតហេតុ ធ្វើការពិនិត្យ និងវាស់វែងសពនគរបាលវិចខ្ចប់ដឹកតាមរថយន្តសង្គ្រោះ បញ្ជូនដល់ផ្ទះជនរងគ្រោះនៅខេត្តប៉ៃលិន ហើយម៉ូតូជនរងគ្រោះ និងរថយន្តបង្ក ត្រូវបានយកទៅរក្សាទុកនៅអធិការដ្ឋាននគរបាលស្រុកព្រះនេត្រព្រះ ដើម្បីអនុវត្តន៍តាមច្បាប់ចរាចរណ៍ផ្លូវគោក៕
