ខេត្តកំពង់ស្ពឺ៖ លោក ជា ទិត្យ អនុប្រធានមន្ទីរបរិស្ថានខេត្តកំពង់ស្ពឺ កាលពីពាក់កណ្តាលខែមីនាឆ្នាំ២០២៣កន្លងទៅបានដឹកនាំមន្ត្រីដែនជម្រកសត្វព្រៃភ្នំឱរ៉ាល់ ចុះទៅពិនិត្យទីតាំងដីព្រៃរបស់រដ្ឋដែលការពារដោយព្រះរាជក្រឹត្យ ខណៈដែលមានក្រុមជនខិលខូចលួចដាក់គ្រឿងចក្រជីកាយ ឈួសឆាយរុករានទន្ទ្រានយកធ្វើជាកម្មសិទ្ធផ្ទាល់ខ្លួនរាប់រយហិកតានោះ ប៉ុន្តែរហូតមកដល់ពេលនេះស្ងាត់ឈឹង! ប្រជាពលរដ្ឋដាក់ការសង្ស័យថា អស់លោកមន្ត្រីជំនាញប្រហែលជាបានសើមមាត់សើមករពីក្រុមជនខិលខូចទាំងនោះអស់ហើយទេដឹង? ទើបគ្មានចំណាត់ការអ្វីសោះ!។
បើយោងសេចក្តីរាយការណ៍ពីប្រជាពលរដ្ឋបានឲ្យដឹងថា កន្លងទៅមានក្រុមជនខិលខូចលួចដាក់គ្រឿងចក្រជីកាយ ធ្វើការឈួសឆាយ រុករានទន្ទ្រានដីព្រៃរបស់រដ្ឋការពារដោយព្រះរាជក្រឹត្យ អស់រាប់រយហិកតា ដើម្បីយកធ្វើជាសម្បត្តិផ្ទាល់ខ្លួន និងលក់បន្តទៅឱ្យអ្នកមានលុយមានអំណាចថែមទៀតផង។
ប្រជាពលរដ្ឋបានឲ្យដឹងបន្តទៀតថា ដីព្រៃរបស់រដ្ឋការពារដោយព្រះរាជក្រឹត្យ ដែលក្រុមជនខិលខូចលួចដាក់គ្រឿងចក្រជីកាយ ឈួសឆាយ រុករានទន្ទ្រានយកនោះ នៅចំណុចជើងភ្នំប្រាក់ ស្ថិតនៅក្នុងភូមិថ្មី(សូរិយា) ឃុំតាសាល ព្រំប្រទល់ជាមួយភូមិសំរោង ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ សង្ស័យមានការឃុបឃិតគ្នាជាប្រព័ន្ធហើយ ទើបក្រុម ឈ្មួញខិលខូច នឹងអ្នកមានលុយអ្នកមានអំណាច អាចដាក់គ្រឿងចក្រឈូសឆាយរុករានទន្ទ្រានកាន់កាប់ដីព្រៃរបស់រដ្ឋ គ្មានច្បាប់អនុញ្ញាតយកធ្វើជាកម្មសិទ្ធិជាច្រើនហិកតា ដោយមិនខ្លាចញញើតនិងច្បាប់ អាជ្ញាធរឃុំ ស្រុក ខេត្ត និងជំនាញពាក់ព័ន្ធហាក់បីដូចជាមិនអើពើ និងចាត់វិធានការទាល់តែសោះ។
ជាក់ស្តែងនៅថ្ងៃទី១៤ ខែមីនា ឆ្នាំ២០២៣កន្លងទៅថ្មីៗនេះលោក ជា ទិត្យ អនុប្រធានមន្ទីរបរិស្ថានខេត្តកំពង់ស្ពឺ បានដឹកនាំកម្លាំងការិយាល័យដែនជម្រកសត្វព្រៃភ្នំឱរ៉ាល់ចុះទៅពិនិត្យដល់ទីតាំងដីព្រៃរបស់រដ្ឋការពារដោយព្រះរាជក្រឹត្យ ដែលក្រុមជនខិលខូចលួចដាក់គ្រឿងចក្រជីកាយ ឈួសឆាយ រុករានទន្រ្ទានរួចហើយនោះ លោកបានឲ្យដឹងថា ពិតជាមានការឈួសឆាយដីព្រៃរបស់រដ្ឋមែន ប៉ាន់ស្មានប្រហែលជាង១០ហិកតា ដីនេះស្ថិតនៅភូមិសំរោង ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ ។
លោក ជា ទិត្យ បានឲ្យដឹងទៀតថា រឿងក្រុមជនខិលខូចលួចដាក់គ្រឿងចក្រជីកាយ ឈូសឆាយ រុករានទន្ទ្រានដីព្រៃរបស់រដ្ឋខាងលើនេះ បើខ្មោចស្រុកឲ្យដៃ ខ្មោចព្រៃក៏មិនហ៊ានដែរ។
លោកបានឲ្យមន្ត្រីការិយាល័យដែនជម្រកសត្វព្រៃភ្នំឱរ៉ាល់ ដើរចុចទីតាំងដីដែលក្រុមជនខិលខូចលួចដាក់គ្រឿងចក្រជីកាយ ឈូសឆាយ រុករានទន្ទ្រានរួចហើយនោះ ចង់ដឹងថាតើដីនេះស្ថិតនៅតំបន់សហគមន៍ ឬនៅតំបន់ណា ងាយស្រួលធ្វើរបាយការណ៍បញ្ជូនទៅថ្នាក់លើ ដើម្បីឆ្លងយោបល់ពីថ្នាក់លើ សូមធ្វើការដកហូតទីតាំងដីខាងលើនោះមកទុក្ខជាសម្បត្តិរដ្ឋវិញ។
លោក ជា ទិត្យ បានបន្តទៀតថា ចំណែកក្រុមជនខិលខូចដែរលួចដាក់គ្រឿងចក្រជីកាយ ឈួសឆាយ រុករានទន្ទ្រានដីព្រៃការពារដោយព្រះរាជក្រឹត្យខាងលើនោះ លោកឲ្យកម្លាំងការិយាល័យដែនជម្រកសត្វព្រៃភ្នំឱរ៉ាល់ ចុះស្រាវជ្រាវកំណត់មុខសញ្ញាដើម្បីធ្វើរបាយការណ៍បញ្ជូនទៅថ្នាក់លើដើម្បីចាត់ការបន្តតាមនីតិវិធីច្បាប់ លោកថា មិនឲ្យជនល្មើសរួចខ្លួននោះទេ ។
ពលរដ្ឋថាការលើកឡើងរបស់លោក ជា ទិត្យ អនុប្រធានមន្ទីរបរិស្ថានខេត្តកំពង់ស្ពឺ រហូតមកដល់ពេលនេះទីតាំងដីដែលក្រុមជនខិលខូចលួចដាក់គ្រឿងចក្រជីកាយ ឈួសឆាយ រុករានទន្ទ្រានយកនោះ នៅមិនទាន់មានកម្លាំងជំនាញណាចុះមកធ្វើការដករហូតទុក្ខជាសម្បត្តិរដ្ឋនោះឡើយ ចំណែកឯក្រុមជនខិលខូចកម្លាំងជំនាញនៅមិនទាន់ស្រាវជ្រាវនិងកំណត់មុខសញ្ញាឃើញដែរ ។
ពលរដ្ឋដាក់ការសង្ស័យថា ប្រហែលកម្លាំងជំនាញពាក់ព័ន្ធបានសើមមាត់សើមករពីក្រុមជនខិលខូចអស់ហើយមើលទៅ បានរហូតមកដល់ពេលនេះមិនទាន់មានចំណាត់អ្វីសោះ ។
ប្រភពពីប្រជាពលរដ្ឋដែលរស់នៅក្នុង ឃុំតាសាលនឹងឃុំត្រពាំងជោ នៃស្រុកឱរ៉ាល់ ខេត្តកំពង់ស្ពឺ បានឲ្យដឹងទៀតថា: ជនខិលខូចដែលហ៊ានយកគ្រឿងចក្រទៅធ្វើការឈូសឆាយរុករានទន្ទ្រានដីព្រៃរបស់រដ្ឋ ដែលការពារដោយព្រះរាជក្រឹត្យ{នៅចំណុចជើងភ្នំប្រាក់} គ្មានច្បាប់អនុញ្ញាតនោះ ត្រូវបានគេស្គាល់ឈ្មោះ {តាប៉ាង} អាយុប្រហែល៦០ឆ្នាំ បានធ្វើសកម្មភាពលួចដាក់គ្រឿងចក្រឈូសឆាយដីព្រៃរបស់រដ្ឋទាំងយប់ទាំងថ្ងៃយ៉ាងគគ្រឹកគគ្រេងហាក់គ្មានខ្លាចញញើតច្បាប់សូម្បីតែបន្តិច ដោយសារតែអាជ្ញាធរពាក់ព័ន្ធជាច្រើនស្ថាប័នមិនធ្វើការបង្ក្រាបសោះឡើយ។
ប្រជាពលរដ្ឋរស់នៅក្នុងស្រុកឱរ៉ាល់ បាននិយាយឲ្យដឹងទៀតថា: បើគ្មានការបើកដៃពីមន្ត្រីបរិស្ថាន មេឃុំតាសាល មេឃុំត្រពាំងជោ ក៏ដូចជាអាជ្ញាធរស្រុកឱរ៉ាល់ ទេនោះ គឺសកម្មភាពដាក់គ្រឿងចក្រឈូសឆាយរុករានទន្ទ្រានកាន់កាប់ដីព្រៃរបស់រដ្ឋ នៅក្នុងភូមិសាស្ត្រស្រុកឱរ៉ាល់ មិនអាចកើតឡើងបានទេ។
ប្រជាពលរដ្ឋរស់នៅក្នុងស្រុកឱរ៉ាល់ បានស្នើរសុំយ៉ាងទទូចដល់ លោក វ៉ី សំណាង អភិបាលខេត្តកំពង់ស្ពឺ គួរចាត់មន្ត្រីជំនាញចុះ ពិនិត្យទីតាំងដីព្រៃរបស់រដ្ឋដែលការពារដោយព្រះរាជក្រឹត្យ ឡើងវិញផង ដើម្បីស្រាវជ្រាវកំណត់មុខសញ្ញាក្រុមជនខិលខូចនឹងនាក់ពាក់ព័ន្ធ យកមកចាត់ការបន្តតាមនីតិវិធីច្បាប់ ពីព្រោះត្រឹមតែរយៈ ពេលខ្លីសោះ ដីព្រៃរបស់រដ្ឋជាច្រើនហិកតា បានក្លាយជាវាលរហោស្ថានអស់ទៅហើយ៕
