កំពង់ស្ពឺ៖ កម្លាំងនគរបាលការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តកំពង់ស្ពឺ សហការជាមួយអាជ្ញាធរមូលដ្ឋាន ឆ្មក់ចូលទីតាំងហាងខារ៉ាអូខេមួយកន្លែង សង្ស័យបង្កប់សេវាបម្រើផ្លូវភេទដល់ភ្ញៀវដែលចូលទៅកម្សាន្តនៅទីនោះ។ ករណីនេះបានធ្វើឡើងនៅព្រឹកថ្ងៃទី២៣ ខែឧសភា ឆ្នាំ២០២៣ ក្នុងទីតាំងខារ៉ាអូខេយីហោ(មាន់ស្រែ បន្លែធម្មជាតិ) ភូមិបឹងស្តុក ឃុំបសេដ្ឋ ស្រុកបសេដ្ឋ ខេត្តកំពង់ស្ពឺ។
លោក ចន សុភិត អធិការនៃអធិការដ្ឋាននគរបាលស្រុកបសេដ្ឋ បានឱ្យដឹងថា ក្នុងប្រតិបត្តិការបង្ក្រាបនេះដឹកនាំដោយ លោកស្រីវរសេនីយ៍ឯក មួន មល្លិការ នាយការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តកំពង់ស្ពឺ សហការជាមួយអាជ្ញាធរមូលដ្ឋានស្រុក។ ទីតាំងខារ៉ាអូខេ យីហោ(មាន់ស្រែបន្លែធម្មជាតិ) មានបន្ទប់ផ្ដល់ឱ្យភ្ញៀវអាចរួមភេទដោយយកកម្រៃពីស្រីបម្រើ និងភ្ញៀវ ក្នុងនោះមានបន្ទប់ចំនួន ២ ដែលត្រូវបានកំណត់ថា ជាកន្លែងបានអនុញ្ញាត និងប្រព្រឹត្ដកន្លងមក។
យោងតាមបញ្ជារបស់លោកឧត្ដមសេនីយ៍ទោ សម សាមួន ស្នងការនៃស្នងការដ្ឋាននគរបាលខេត្ដកំពង់ស្ពឺ និងដោយមានការសម្របសម្រួលពីតំណាងអយ្យការ អមសាលាដំបូងខេត្ដកំពង់ស្ពឺ ប្រតិបត្តិការបង្ក្រាបនេះ សមត្ថកិច្ចបានឃាត់ជនសង្ស័យចំនួន ៣នាក់ ដែលរកឃើញថា បានជាប់ពាក់ព័ន្ធក្នុងការអនុញ្ញាត និងផ្ដល់សិទ្ធិទទួលកម្រៃពីភ្ញៀវ និងនារីបម្រើសេវាផ្លូវភេទ ក្នុងនោះ ឈ្មោះ យូ អាត់ ភេទប្រុស អាយុ៤៥ឆ្នាំ(ជាថៅកែ) ឈ្មោះ ឈឹម សុធាវី ភេទស្រី អាយុ ៥២ឆ្នាំ(ជាថៅកែ) និងឈ្មោះ លី ខ្មុំ ភេទស្រី អាយុ ៣០ឆ្នាំ ជាមេការគ្រប់គ្រងនារី។
សូមបញ្ជាក់ថា ក្នុងប្រតិបត្តិការនោះសមត្ថកិច្ចក៏បានធ្វើការសង្គ្រោះនារីចំនួន ១៨នាក់ ដែលជាមុខសញ្ញាបម្រើសញ្ចាកម្ម។ នៅចំពោះមុខសមត្ថកិច្ចនារីទាំង ១៨នាក់ បានអះអាងថា ពួកគេជានារីរងគ្រោះដោយថៅកែបញ្ចុះបញ្ចូលឱ្យទទួលភ្ញៀវ ដើម្បីរកម្រៃចែកគ្នា។ បច្ចប្បន្នកម្លាំងសមត្ថកិច្ចបានកំពុងដំណើរការសាកសួរ និងកសាងសំណុំរឿងចាត់ការតាមនីតិវិធីច្បាប់៕
